"Sentru votasaun EP Tomagua mak akontese eleitór ida vota tiha hasai fali fotografia ho nia telefone," dehan Diretór STAE Baukau, Lucio Salvador Freitas iha salaun apuramentu Baukau, sabadu (19/03).
Sidadaun ne’e, tama ba kabina laran lori ho telefone, nune'e remata tuu tiha kandidatu favorite hasai foto, maibé ikus fiskais sira haree, halo reklama no parte segúransa PNTL mós halo kedas atuasaun.
"Ne'e ha'u konsidera krimi eleitóral, tanba votu ne'e, ita vota segredu, i lei mós bandu atu labele hasai foto iha kabina laran," nia hatete
Alende ne’e, iha problema seluk, maibé STAE ho fiskais konsege rejolve iha sentru votasaun Tomagua Laga.
"Ohin iha Laga mak ita iha problema, bukti fisik, votus validu ba kandidatu númeru 14, iha meza leten ne'e, votus validu 220, hakerek iha fitcar ne'e 221, ida ne'e mak problema, maibé ita nia funsionáriu sira konsege esplika ho maneira oin-oin, maibé sira la simu, entaun tau iha reklamasoes," dehan nia
Durante prosesu eleisaun iha Munísipiu Baukau kuaze la'o di'ak, tanba hetan segúransa masimu husi Polísia Nasionál Timor-Leste (PNTL) Munísipiu Baukau. (*)
