“Ohin, Kandidatu Lú Olo akompaña ho preokupasaun sidadaun balun reklama iha sentru votasaun paralelu iha Díli tanba sira-nia naran la tama iha lista eleitorál atu tuir votasaun. Kandidatu Lú Olo lamenta ho fallansu servisu tanba sidadaun balun lakon sira-nia direitu atu vota ohin”, dehan Reprezentante Ekipa Susesu Kandidatu Lú Olo, Fernando dias Gusmão, liuhusi komunikadu imprensa ne'ebé www.tempotimor.com asesu,sábadu (19/03).
Ba kestaun ne’e nu’udar fallansu ida ne'ebé akontese iha períodu preparasaun ba eleisaun prezidensiál, maibé seidauk bele konsidera ida ne’e nu’udár irregularidade husi eleitorál ida.
Tanba foin ba dahuluk, Timor-Leste hari’i sentru votasaun paralelu atu permite eleitór sira bele vota iha fatin ne’ebé sira estuda, servisu, tanba ne'e sistema foun ida ne'e, ezije meiu komunikasaun no liña koordenasaun di'ak entre STAE no ajente implementasaun to’o nível suku.
Nune’e husu ba Sekretáriu Tékniku Administrasaun Eletorál (STAE) atu haree problema sira ne'ebé akontese sai nu’udár lisaun atubele organiza di'ak liután sentru votasaun paralelu sira iha Dili hodi garante direitu votu ba sidadaun hothotu iha eleisaun sira iha tempu tuir mai.
Maibé Kandidatu Francisco Guterres Lú Olo apresia partisipasaun sidadaun hothotu ne’ebé ezerse sira-nia direitu sivíku hili sira-nia kandidatu sai Prezidente Repúblika ba períodu 2022-2027.
“Eleisaun ohin nian iha Timor-Leste laran tomak no iha rai-liur la’o ho hakmatek. Ne’e hatudu maturidade polítiku povu nian husi loron ba loron sa’e babeibeik”, hatete nia.
Aleinde apresia mós serbisu sira husi orgaun eleitorál sira hanesan STAE no Komisaun Nasioonál ba Eleisaun sira CNE, ne’ebé organiza no halo supervizasaun ba eleisaun Prezidente Repúblika atu sidadaun hothotu bele ezerse ninia direitu ba tuir votasaun.
Maske sidadaun ida-idak ezerse ona ninia direitu ba vota, maibé husu atu timoroan hotu bele tuir kontajen votu no fó fiar tomak ba orgaun eleitorál sira atu ezerse sira-nia funsaun ba kontajen votu no apuramentu to’o entrega rezultadu ikus ba Tribunál Rekursu, mak sei anunsia rezultadu finál ba eleisaun Prezidente Repúblika. (*)
