Tanba, buletin de votus sira ne'ebé sai husi imprensa nasionál, iha loron 12 fulan-marsu tinan-2022, STAE nasionál halo kedas distribuisaun ba matérial siensetivu no nonsiensetivu sira ba nivél Munísipiu, tuir númeru eleitorál no iha mós adisioál pursentu 10 atu sidadaun sira tuu sala ou hakerek sala, bele troka.

Bainhira matérial sira to'o iha nivél Munísipal, ékipa sira halo kedas verifikasaun ba númeru serial kada bulentin votus ho kada livru iha follas 50.

"Aat ne'e iha rua de'it, tinta kona, makina kuandu imprime ne'e tinta namkari kona buletin foer, ne'e tenke hasai tiha, ida seluk fali mak nakles, dala ruma mákina print sai nakles tiha, só buat rua ne'e mak akontese, ne'ebé Munísipiu hotu-hotu verifika akontese buat rua ne'e, ne'ebé lalos, kuandu públiku hatete bulentin ne'e, balun tuu kuak tiha ona ne'e laiha, la'os hanesan ne'e, loos ne'e mak tinta kona balun nakles," dehan MAE hafoin partisipa iha distribuisaun matérial siensetivu no nonsiensetivu ba sentru votasaun sira iha Baukau, sesta (18/03).

Bulentin votus ne'ebé nakles no tinta kona sei hasai, (rai hela) alista iha akta, hodi aprezenta iha nasionál bainhira eleisaun remata.

"Akontese sira ne'e, la'os iha Covalima hanesan ita rona, mais iha Munísipiu hotu-hotu," nia hatete

Tanba ne’e, buletin votu ne'ebé ohin halo distribuisaun ba kada sentru votasaun, iha loron 19 fulan-marsu tinan-2022 (aban) tuku 6:00 ékipa sei hahú halo verifikasaun hafoin realiza votasaun.

"Se buletin ladi'ak aat tinta kona nakles ne'e, tenke hasai tiha, fó mak ida di'ak ba populasaun, buat hotu halo tuir regra, laiha invensaun manipulsaun," nia argumenta

Akontesementu refere, la'os iha periodu eleisaun Prezidénsial tinan-2022, maibé ínisiu husi eleisaun anterior mós akontese hanesan.

Nia konsidera informasaun ne’ebé lansa iha média buletin votus hahú kuak, ne'e inisiativa husi ema balun tenta dezakridita prosesu eleitóral.

Alende mós, nia enkoraja eletóres sira liu-liu iha Munísipiu Baukau laran, hahú aban dadersan tuku 7:00 hakbesik aan ba sentru votasaun hodi ezerse direitu liuhusi vontade polítika hili Prezidente Repúblika periodu 2022-2027.

"Eleisaun Prezidénsial 2017 iha 75 pursentu de'it mak ba vota iha timor laran tomak, ha'u hakarak partisipasaun sa'e oituan," nia hatete

Nune’e, iha tinan-2022 Governu esforsu aumenta sentru votasaun no estasaun votasaun iha Teritóriu nasionál. (*)