Ba apoiante husi Kandidatu sira ne’ebé provoka malu iha Munisípiiu Baukau, tanba ne’e apoiante husi CNRT labele provoka apoiante seluk iha tempu kampaña nomós dor to dor hodi buka votu ba Kandidatu Prezidente Repúblika (PR) períodu 2022-2027, José Ramos Horta.

“Ida ne'e ha'u husu de'it ba imi hotu hakmatek, tanba iha Baukau, husi Governu aitonka ninia ema baku malu, oho malu, ne'e duni ita iha Suai-Covalima tenke hatudu ita-nia kakutak ne'e iha, imi rona. Dor to dor oin seluk labele provoka malu, para ita bele sai garante ba estabilidade nasaun nian, imi rona”, dehan Xanana liuhusi iha Kampaña loron dahitu ba Kandidatu PR Jose Ramos Horta, iha Kampu Futebool Suai Vila, Munisípiu Covalima, tersa (08/03).

Bainhira kampaña la'o ho susesu, Covalimaoan tenke hatudu matenek no lalika preokupa ho ema ne'ebé hasai liafuan, hakilar nakonu ho provoka no insultu.

“Hanesan ohin ha'u halo, avó Horta temi beibeik Xanana-Xanana, ha'u taka tiha tilun, ha’u la rona, ema insulta no provoka ita karik, tau tixu iha ita-nian tilun la'o de'it ba, lalika liga, rona ka la'e”, esplika Xanana.

Iha ne'e, Xanana rasik kandidatu Prezidente Repúblika hothotu maibé so iha kandidatu ida de'it mak, Xanana sei la respeitu tanba nia sai tiha Prezidente Repúblika viola fali konstituisaun.

Kandidatu PR José Ramos Horta hatete, nia parte sei hametin liután relasaun di'ak ho Indonézia kona-ba servisu interna balun, no sei servisu ho Arte Marsiál sira, no Arte Rituál sira oinsá bele kontribui hametin dame hodi evita labele violénsia.

“Ha’u manán karik, la'ós FRETILIN mak lakon, la’ós Lere mak lakon, la’ós kandidatu sira seluk mak lakon, e la’ós ha’u-nia tian Berta mak lakon, e ha’u sei ba kedas Ainaro hakuak ha’u-nia tian Berta”, esplika nia.

Horta rasik mós admira ba Lere, tanba ema ida kombatente, bainhira manan sei buka hakuak no konvida atu servisu hamutuk.

“Purtantu ha’u-nia vitória ne'e vitória imi-nia, la’ós derota ema seluk nian, vitória para ita hamutuk ho maun boot Xanana, ida mak atu loke dalan mai ita”, deklara nia. (*)