“Ha'u-nia hanoin ema sira kanek ne'e tenke hetan tratamentu, segundu ita iha lei, implementasaun ne'e mak tenke rigor, se mk halo krime nia mak tenke ba hatan, tanba ne'e la'ós orientasaun husi lideransa ka kandidatu, ka líder partidu”, dehan Reprezentante Ekipa Susesu Kandidatu Lú Olo, Fernando Gusmão, iha Luz Claritas, Formoza, segunda (07/03).

Ba prezidente Lú Olo sei sai Prezidente nasaun nian, kaer metin unidade nasionál, kaer metin funsionamentu organ estadu sira-nia, tanba ne'e lakohi Timor-Leste monu fali ba situasaun ne’ebé ema hotu la aseita.

“Ema indivu ne'ebé halo krime ita iha lei, ne'ebé mak ita-nia autoridade polísia sira bele kaer, lori ba halo investigasaun tuir lei nian, tanba iha mídia parte rua hetan hotu agregasaun, parte KHUNTO nian mós hetan, parte militante FRETILIN nian mós hetan ne'ebé sira rua hetan ne'e hanesan de'it”, afirma nia.

Tanba komunikasaun entre líder sira la'o nafatin, kapas tebes tanba ne'e husu ba militante, sinpatizantes, apointe sira hakmatek, ba lideransa sira iha komunikasaun ne'ebé di'ak.

Ho ida ne’e, husu ba autoridade Seguransa liliu Polísia Nasionál Timor-Leste (PNTL) atu kontrolu situasaun kampaña nian.

“Para ema sira ne'ebé hanoin la di'ak ne'e, la bele aproveta situasuan ne'e lori soran ita-nia líder sira, soran mós ita-nia povu, ida ne'e mak kandidatu husi Francisco Guterres “Lú Olo’ nia mensajen para públiku tomak bele iha koñesimentu bele rona didi'ak, katak laiha orientasaun atu estraga situasaun”, haktenik nia.

Situasaun ne'e akontese tuda malu horisehik iha minisípiu Baukau no Manufahi-Same ida ne'ebé iha soke oituan entre militante ka, sipantizante, apoiante, husi kandidatu sira-nian.

“Ba ida ne'e kandidatu Francisco Guterres 'Lú Olo' apela ba militante, sipantizante, apoiante sira, ba juventude sira, ba povu tomak atu kuidadu, tanba iha tensaun husi ema ne'ebé lakohi ita-nia nasaun moris iha estabilidade ne'ebé di'ak, sira hakarak sobu ita-nia situasaun ne'ebé la'o kapas tebtebes, ida ne'e mak tenke kuidadu e ita la bele halo violénsia", hatutan nia.

Nune’e, husu povu tomak atu promove paz, estabilidade, hakmatek iha ida-idak nia fatin, nune’e kampaña ne'ebé la'o dadauk ho susesu to'o loron eleisaun. (*)