“Oinsá ita fahe malu iha 1975, oinsá ita fahe malu iha 1999, oinsá ita fahe malu iha 2006, oinsá ho planu ida atu fahe tán ne'e barak-barak sei mosu tán, hakarak fera tán, hakarak destroi tán, maibé kandidatu ida ne'e sei hapara ida ne'e bainhira hili Assanami sei hapara manobra oioin para halo terus tán povu ida ne'e”, dehan Kandidatu Prezidente Repúblika (PR) husi Partidu Demokrátiku (PD) període 2022-2027, Mariano ‘Assanami’ Sabino, iha abertura kampaña iha Munisípiu Aileu, kuarta (02/03).

Tanba nu’udar joven mileniál ida uluk terus ona, kesi kabun, halo demostrasaun, no hetan mós torturasaun tama kadeia maibé agora ukun-an ona, lakohi tan situasaun moris ida ne'e mosu.

“Tanba ne'e mak presiza líder atu hodi joven ne'e ba kompete teknolójia, hadi'a sistema saúde no edukasaun para fó moris no vida naruk maibé vida naruk ho matenek ho kakutak ne'ebé as’uain”, hatete nia.

Tanba ne’e, komunidade ne’ebé deklara ona vota ho konsiénsia, maibé barak hamrik ona, kontinua buka nafatin hamutuk ho hakrak ida ba oin Timor-Leste ida ne’ebé di’ak.

“Kuandu ha'u deklara iha Partidu demokrátiku, lima ida foti sa'e ne'e katak Timor ne'e ba oin, Timor nakolke ba timoroan hothotu, e tenke hatuur timor foun ida”, dehan nia.

Maibé presiza sosiedade modernu, sosiedade sivilizadu, no sosiedade demokrátiku ne'e supremasia lei, tanba ne'e mak tenke hakruuk ba lei, labele halimar ho lei, lei tenke loloos ba ema hotu.

Ho ida ne’e, Lei la’ós kria ba grupu ida de'it, no la’ós ba sira ne'ebé la gosta, sira ne'ebé sente kompetetivu, hamate nia atu labele kompete ho nia, ne'e ditadura, la’ós valoriza ema, la’ós politiku umanista ne'ebé Timor-Leste luta. (*)