Tempotimor (Dili)-Kandidata Prezidente Repúblika (PR) Independente períodu 2022-2027, Milena Pires, hakarak sai Prezidente Repúbliki hodi halo mudansa ba povu nia moris.

“Ha'u-nia logu kampaña, tinan foun, polítika foun mak dalan ba mudansa no povu nia moris di'ak, tanba ida ne'e mak ha'u hakarak kandidata-an, la'ós atu sai boot, la'ós atubele sa'e karreta di'ak, la'ós atu ba tur iha aitarak laran. Atubele halo buat ruma ba povu nia moris di'ak”, dehan Milena hafoin kampaña dahuluk iha Postu Administrativu Gleno, Munisípiu Ermera, kuarta (02/03).

Tanba, eleisaun preziensiál ne'ebé mak sei hala'o iha loron 19 marsu 2022, ne'e importante loos, atubele kontribui ba Timor-Leste ninia dezenvolvimentu iha futuru.

“Ha’u hamrik iha ne'e ohin loron iha ita-nia oin, tanba hakarak kontribui ba Timor-Leste ida ne'ebé inkluzivu, Timor-Leste ida ne'ebé timoroan hothotu, sinte katak sira hola parte ba ida ne'e”, dehan nia.

Timor-Leste tenke iha oportunidade hanesan ba timoroan hothotu iha no tenke Timor-Leste ida ne'ebé justu, ema hanesan hotu iha justisa nia oin, la'ós justisa ba povu ki'ik de'it.

Tanba hanesan públiku tomak haree no rona bebeik povu nia halerik, katak justisa ne'e ba de'it povu ki'ik maibé ba fali boot sira ladun iha justisa.

Ho situasaun hirak ne'e, Prezidente Repúblika presiza hakbesik-an ba povu, no tenke moris iha povu nia let, labele tur de'it iha Aitarak laran, loroloron taka de'it aan iha Aitarak Laran, husik nia povu moris at iha baze.

“Servisu bele hakna’ar-an iha Aitarak Laran, maibé semana rua hanesan tenke tun ba hamutuk ho povu, haree ho matan, saida mak povu nia moris loroloron, kompriende saida mak povu nia halerik, difikuldade ne'ebé mak iha ita-nia moris loroloron”, hatete nia.

Tanba hanesan públiku hatene katak babain ema barak atu iha de'it etu bikan tolu loron ida atu hán susar teb-tebes, ne'e mak prezidente repúblika presiza sai konsiénsia Estadu Timor-Leste nian, ba saida mak povu nia moris di'ak. (*)