Kandidatu Lamukan ne’ebé koko dada simpatia husi sidadaun sira iha loron dahuluk kampaña eleitorál ne’ebé hahú ho Konferensia Imprensa iha Sede Kandidatu, Farol, kuarta (02/03)
Ba proposta Orsamentu Jerál Estadu (OJE) 2023 ne’ebé sei hetan veta husi Prezidente Repúblika, bainhira Governu no Parlamentu nasionál la tau prioridade alokasaun ba seitór edukasaun, agrikultura no saúde.
“Ha'u-sai Prezidente sei la promulga Orsamentu Jerál Estadu bainhira Governu-Parlamentu la tau alokasaun rezolve ba setór xave sira hanesan edukasaun, saúde, agrikultura”, dehan nia ha Sede Nasionál Kandidatu, Faról, kuarta (02/03).
Bainhira sai Prezidente Repúblika sei mós aplika planu polítika, oinsá Governu no Parlamentu Nasionál bele tau atensaun ba setór sira ne'ebé mak sai hanesan xave ba dezenvolvimentu nomós rekomenda ba Governu atu eleva Sekretáriu Estadu Juventude ba Ministériu ida.
“Tanba ne'e ha'u presiza imi-nia votu, vota mai ha'u iha loron 19 fulan-marsu, vota númeru 12 no vota ba Unidade Nasionál”, afirma nia
Nu’udar jerasaun foun ne'ebé iha previléziu, sai sasin, nomós sai protagonista iha luta libertasaun nasionál, deside kandidata-an ba Prezidente Repúblika ne'e la'ós atu buka oportunidade hodi konkista prestiju polítiku ruma, maibé nu’udar devér intranjizante ida atu kontinua luta ne'ebé jerasaun tuan sira halo iha nasaun Timor-Leste.
Kontribuisaun luta ne'e, Jerasaun tuan sira lori ona povu ba ukun rasik-an, entaun tempu ona atu jerasaun foun hatutan luta ida ne'e liuhusi konsolidasaun independénsia, defende soberania nasionál, hametin unidade nasionál hodi rekonstrui nasaun Repúblika Demokrátika Timor-Leste (RDTL).
Tanba ne'e, ko'alia kona-ba rekonstruisaun nasionál ne'e la'ós de'it reskonstrusaun fízika, hari’i uma boot-boot ka loke estrada boot maibé oinsá atu ko'alia kona-ba rekonstrui sosiédade ne'ebé frankmentada, tanba període naruk kolonializmu no okupasaun estranjeiru nian.
“Restaura tiha independénsia, besik tinan 24, tempu ona atu ita hamutuk, oinsá rearmoniza, ita-nia sosiedade, ne'ebé nakfahe ba sentimentu tendénsia polítika oioin, no haree malu hanesan funu maluk, oinsá reintegra ita-nia komunidade ida ne'ebé mak marjinalidade, deskriminada sosiál no polítikamente, tanba komukasaun polítika ne'ebé la hanesan”, hatete nia. (*)
