“Ohin ita kontinua fó apoiu ba organizasaun rua ne'e, oinsá mak sira bele kontinua hala'o sira servisu sekretária nian nomós kontinua uza apoiu ne'ebé CNC fó ona ba sira hodi hala'o atividade iha teren”, dehan Dirétor Ezekutivu CNC, Hugo Maria Fernandes, iha Salaun CNC, Balide Dili, segunda (28/02).

Tanba ne’e kontinuasaun husi akordu ne'ebé antes ne'e la'o ona iha tinan 2021 no tinan 2022 CNC kontinua hatudu ninian kompromisiu hodi kontinua operasionaliza organizasaun rua ne'e.

Fundus ne'ebé mak CNC apoiu ba operasionaliza ASEPOL nian ho montante $42,100 no apoiu ba operasinaliza AVKP ho montante $46,800.

Maske organizasaun rua ne'e, legalmente hamriik ho ida-idak nia estatutu juridiku maibé sira kontinua hala'o servisu organizasaun nian iha komarka antigu Balide hamutuk ho CNC.

Ho nune'e CNC kada tinan tenke elabora akordu anual nian no servisu anual tuir organizasaun rua ne'e nia planu estratéjiku no anualmente sira sei koopera hamutuk ho CNC hodi apoiu finanseiru.

Dirétor Ezekutivu Asosiasaun Politimu Eis Prizioneiru, Martinho Perreira agradese, tebes ba CNC ninia apoiu ba finaseiru ba organizasaun rua ne'e.

Tanba apoiu ida ne'e la’ós foin primeiru maibé apoiu ida ba faze daruak nian ne'ebé iha tinan 2021 CNC fó apoiu ona ba Organizasaun rua ne’e no tinan 2022 CNC kontinua apoiu nafatin.

Ba ASEPOL iha tinan 2022 sei halo rekrutamentu ba funsionáriu ida atu servisu esterna nian no atividade sira seluk kona-ba kapasitasaun hodi halo asembleia jéral nune'e atividade hothotu tenke la'o tuir regra ne'ebé vigora ona iha organizasaun.

Koordenadór Sekretariadu Nasionál Asosiasaun Vitima, Domingos Pinto de Araujo Moniz hatete, asina nota ne'e hetan apoiu husi CNC ho montante $46,800, ho razaun tinan 2022 sei rekruta tan funsionáriu na'in-3 ho Pozisaun hanesan Jerente Programa, Asistente Administrasaun no Finansas inklui Asistente tékniku. (*)