Diretór STAE Munisípiu Baukau, Lucio Freitas Salvador hatete, kada époka eleisaun transporte sai preukupasaun ba STAE Munisípiu, maibé prontu atu implementa prosesu hotu.
"Ita identifika hotu tiha ona, iha 32 sentru votasaun risku ita labele asesu ho viaturas, maibé ita sei prepara fundus ba karegadores para to'o iha ne'eba ema liu labele, kuda liu labele, viaturas liu labele, ultimu rekursu mak tenke ba ho ema, sé ida ne'e mak labele ona eleisaun labele realiza iha dia 19, maibé tuir lei segundu dia," dehan Lucio iha kna'ar fatin, vila nova Baukau, segunda (28/02).
Sentru votasaun ne'ebé risku ba viaturas mak, iha Postu Administrativu, Baukau Vila, Baguia, Laga, Kelikai, Venilale inklui Vemase.
Tanba, fatin hirak ne’ebé la asesu ba estrada mak, iha Postu Baukau Vila sentru votasaun ida iha Suku Gariuai Uatua, Postu Laga sentru votasaun ida iha Suku Atelari, ida iha Sagadate no ida iha Suku Libagua.
Postu Administrativu Baguia bainhira iha tempu udan transporte labele liu to'o sentru votasaun, Suku Afalokai, Suku Osso-huna no Suku Hae-koni, Suku Larisula no Suku Samalari (Postu
Postu Administrativu Kelikai, fatin sentru votasaun ne'ebé estremamente liu mak iha Aldeia Uadaboru, Suku Gurusa.
"Iha Venilale Osso-gori ne'e mak karreta uza trasaun mós labele, rekursu ikus liu mak kuda ho ema, ida Vemase nia mak sentru votasaun Uaiharebo, kada époka eleisaun ne'e iha ne'eba sempre problema, tanba hakur mota estrada ladi'ak," nia hatete
Nune'e, Administradór Postu Venilale, Miguél Mendes Manso Guterres hatete, sentru votasaun iha Postu Venilale hamutuk 16 ho estasaun votasaun 20.
"Fatin ne'ebé karreta ba ladi'ak mak Suku Uaioli, Aldeia Osso-gori Suku Uatuhako, ida fali Suku Bahamori Aldeia Lakuoma karreta ba di'ak, maibé presiza karreta ne'ebé ho rotora, maibé bainbain labele, fatin ne'e ha'u survey hotu ona, Lakuoma ne'e karreta bele ba, maibé ba Uaioli no Osso-gori ne'e meuis simu mak aviaun ne'e," nia informa
Bainhira ema mak lori, presiza seguránsa ne'ebé mutua (akompañia di'ak), maibé mota boot tuun imposivél tebes atu hakat liu, tanba ne'e nia solusaun mak presiza lori ho aviaun.
Enkuantu sentru votasaun ba eleisaun Prezidensiál tinan 2022 iha Munisípiu Baukau hamutuk 125. (*)
