“Primeiru estar asegura sidadaun sira-nia diretu ne'ebé liuhusi seguransa sosiál báziku, ba sidadaun sira ne'ebé atinje tinan 17 ba leten, sei hetan diretu husi seguransa sosiál báziku”, dehan nia iha Salaun Komisaun Nasionál ba Eleisaun sira (CNE), segunda (28/02).

Bainhira eleitu sei aplika programa ne'e, nomos iha kompromisaun rua seluk kona-ba oferese kartaun saúde no edukasaun gratuita ba sidadaun sira oinsá bele asesu ba tratamentu saúde ho edukasaun.

“Tanba ita hatene katak iha konstituisaun sidadaun hotu já esta protejidu, polítika ekonomia e mós sosiál kulturál,”, esplika nia.

Dadaun ne’e tempu ona atu fó atensaun oinsá mak sidadaun hothotu bele hetan diretu ne'ebé mak hanesan, maske kandidatura hothotu iha hanoin hakarak hetan vitoria hodi implementa programa no vizaun.

Hanesan durante tinan 20 nia laran sidadaun hotu akompaña ona katak ukun na'in sira ne'ebé anterior ne'e ladun presta asaun servisu ne'ebé di'ak atubele fó solusaun di'ak ba povu ida ne'e nia moris.

Tanba ne'e labele depende liu ba jerasaun tuan, maibé tempu to'o ona atu iha transformasaun jerasionál, no tempu to'o ona atu jerasaun foun bele kontinua estafeta ida ne'e.

“Ita hatene ona, di'ak mós ita sente ona e la di'ak mós ita sente ona, entaun ha'u hanoin katak tempu to'o ona”, dehan nia.

Maibé ko'alia kona-ba ajenda ba kampaña husi kandidata Angela Freitas da silva nian hetan ona aprovasaun iha CNE, maibé kampaña refere sei evita atu halibur povu barak tanba bazeia ba ambiénte ne'ebé Timor-Leste enfrenta hela, hanesan surtu pandemia globál Covid-19.

“Ami-nia tim susesu ho tán koordenadór Munisípiu sira ne'e, sira halo liu, foka liubá dor to dór. Maibé ami sei tun ba terenu, atubele hato'o iha ami-nia kampaña ba populasaun sira iha distritu 12 inklui RAEOA, Primeiru kampaña sei 6 hahú iha Lospalos”, dehan nia. (*)