Tanba iha loron 13 fulan-fevereiru, Prezidente Repúblika, José Ramos Horta, marka ona loron kampaña ne'ebé sei hahú, iha loron 19 fulan-abríl to'o loron 18 fulan-maiu, no eleisaun parlamentár iha loron 21 fulan-maiu tinan 2023.
Diretór Servisu Munisípal CNE Baukau, Esmeraldo Damião Belo, esplika, servisu CNE Baukau dadaun halo ona preparasaun ba pesoál ofiasial supervizaun nian, ne'ebé tuir planu presiza ema na'in-180 hodi akompañamentu festa demokrasia tinan 2023, husi tempu kampaña to'o eleisaun, inklui mós aprezenta ona fatin kampaña ba CNE Nasionál hodi halo aprovasaun.
"Preparasaun sira ne'e ita garante ona", dehan nia iha kna'ar fatin vila nova, egunda (27/02).
Enkuantu fatin ba partidu polítiku atu uza hato'o komprimísiu polítiku ba povu, mak CNE ho Autoridade Munisípal Baukau, deside ona kampu futeból, iha Suku Gariuai, no kampu futeból Darasula Gariuai, Postu Administrativu Baukau Vila, ne'ebé distánsia do'ok oituan husi Baukau Vila, tanba atu evita konflitu, inklui fó benefísiu ba negósiate k'ik sira iha fatin refere.
"Fatin ne'e ha'u haree bele fó benefísiu ba ita nia komunidade sira ne'ebé fa’an sasan, no diside fatin do'ok oituan husi sidade para menus problema iha tempu kampaña", nia argumenta
Diretór STAE Baukau, Natividade Freitas Guterres, esplika, preparasaun parte STAE Munisípal nian ba eleisaun parlamentár tinan 2023, mak halo ona rekrutamentu ba brigadista no pontu vokal, ne'ebé kandidatu ba brigada hamutuk na'in-551 no kandidatu ba pontu vokál na'in-81, ne’ebé antes ne’e submete dokumentus tuir test eskrita no orál.
Maibé tuir planu sei presiza de'it ema na'in-150 ba brigada, tanba sentru votasaun ne'ebé atu estabele iha Munisípiu Baukau hamutuk 150, nune'e ema na'in-ida ba sentru votasaun ida, enkuantu pontu vokál prezisa de'it na'in-6 hodi estabelese na'in-ida kada Postu Administrativu.
"Ita garante ho brigadista no pontu vokál sira ne'e sei fó susesu ba eleisaun, tanba ita STEA sira apllay ba brigada no pontu vokál mesak ema esperensia de'it, tanba tuir teste ita haree sira ne'e valór di'ak", nia hatete
Alende mós, númeru eleitores provizóriu STAE Baukau rejista hamutuk rihun 80-resin, maibé garante taxa partisipasaun iha Baukau ba eleisaun parlamentár 2023 ne'e sei aumenta, tanba dadaun ekipa STAE Munisípal iha hela tereñu halo resenseamentu ba eleitór sira.
Liga ba parte seguransa, Komadante Komandu PNTL Munisípiu Baukau, Superintendente António De Sa, afirma, eventu kampaña no eleisaun parlamentár tinan 2023, PNTL Baukau preparadu atu fó seguransa iha kualkér tempu.
Nune’e estadu Timor-Leste antes ne'e destaka ona nia Forsa, kompostu husi, komponente terreste FALINTIL-Forsa Defeza Timor-Leste (F-FDTL), Ordem Batallaun Públiku (BOP-sigla portugés) inklui PNTL iha Baukau, hodi fó seguransa ba kualkér eventu, alende tempu partidu polítiku halo kampaña no eleisaun.
"Komandu Baukau, liu-liu PNTL kumpre lei no ordem sempre preparadu, la'os ba eventu eleisaun de'it, maibé atividade normál sira mós ita preparadu, atu asegura eleisaun ne'ebé atu mai", dehan nia
Maske iha eleisaun prezidensiál mosu insidente balun, maibé konsege rezolve, tanba auroridade seguransa servisu hamutuk ho autoridade partidu no artemarsiál sira iha Baukau
Garante ba eleisaun parlamentares tinan 2023, sei la akontese kazu simples no grave ruma ligadu ba tempu kampaña nian no eleisaun nian, tanba populasaun iha baukau, liu-liu joven sira agora, iha ona hanoin di'ak no kontribui paz no dame ba dezenvolvimentu nasionál.
"Ita hotu hatene, populasaun sira kuaze loron ba loron sira nia komportamentu hahú di'ak, tanba adapta aan ba situasaun atual no pasadu sira halo ona ajustamentu ba situasaun sira ne'e", nia argumenta
Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59 iha OPS-59, no totál populasaun hamutuk 126,562, husi populasaun hirak ne’e, maioria ko'alia lian Tetun, Makasa'e, Waimu’a, Midiki, Kairui inklui Naueti. (*)
