Xefe aldeia Rembor, Tomas Maulay Soares hatete, tempu udan laos deit komunidade sira neebé hakarak lori sira-nia produtu ba merkadu iha villa mak hetan difikuldade, maibé difikulta mós estudante sira neebé eskola iha Manatuto villa.
Nia informa, totál Uma-kain iha Rembor hamutuk 350, ho populasaun nain 2.859. Komunidade Rembor maiória moris ho vida ortikultura, hanesan kuda modo no hakiak animal.
Tan nee, asesu estrada no ponte sai importante tebes ba komunidade sira atu bele lori sira-nia produtu ba merkadu.
Tan nee, Tomas husu ba governu atu halo instalasaun ba ponte ligasaun entre aldeia Rembor ba Manatuto atu bele fasilita nia komunidade lori sira-nia produtu ba merkadu.
"Ami husu ba governu atu halo de'it ponte ba ami nia aldeia laran, tanba tempu udan ami labele hakat ba sorin, tanba mota Sumasi tuun sempre sobu hotu ami-nia dalan," dehan Xefe Aldeia Rembor ba www.tempotimor.com, Tersa (08/09).
Iha fatin seluk, Administradór munisípiu Manatuto, Fernando Sousa rekoñese estrada ligasaun Manatuto Villa ba aldeia Rembor to'o oras ne'e seidauk hadi'a tanba laiha orsamentu, maske pedidu reabilitasaun ba governu sentrál nia hato'o ona.
"Pedidu ami hato'o tiha ona, maibé buat hotu ita hein de'it orsamentu husi parlamentu atu aprova, karik pasa ona ita bele haree took iha 2021," dehan nia.(*)
