Xanana hakat ba Rembor ho objetivu atu partisipa iha serimonia enseramentu ba jogu amizade ne'ebé relasiona ho selebrasaun loron konsulta popular ba dala 21.
Iha Tersa (08/09) dader Xanana halao viajen husi Dili ba Manatuto, no iha tuku 10.25 OTL, Xanana too iha aldeia Rembor. Tuir observasaun jornalista www.tempotimor.com, iha ninia vizita nee hetan seguransa masimu husi PNTL Munisípiu Manatutu, ne'ebé asegura situasaun iha dalan hahú husi Manatutu vila to'o iha aldeia Rembor.
Hafoin too iha fatin, lia-nain sira simu Xanana ho lia dadoli. Xefe Aldeia Rembor Tomas Malai Soare esplika, komunidade sira simu ho kultura Munisípiu Manatutu nian ne'ebé hafutar husi uma lisan Uma-Fatuk.
"Ami simu ho kultura Manatutu fo hatais nia ho tais no taka mos sapeo hanesan toos no natar na'in, i simu ho tebedai tuir kultura Manatutu nian," dehan nia.
Kona-ba serimonia enseramentu nee, Tomas dehan, hetan apoiu husi Knua Kay Rala ho osan $200 ho farda jogu futebool nian ba juventude sira hodi selebra loron konsulta popular.
Nia informa, distansia husi Manatutu Vila ba aldeia Rembor kuaze 8 kilometru, nune'e mos xefe familia hamutuk 350 ho total populasaun 2.859 habitantes.
Entertantu serimónia ne'e, partisipa husi Administradór Munisípiu Manatutu, Veteranus, Polísia Nasional Timor-leste (PNTL) Munisípiu Manatutu, autoridade lokais inklui komunidade no juventude sira.(*)
