“Resposta hanesan ohin ha'u ko'alia katak, ko'alia kona-ba formasaun ekipa ne'ebé Konsellu Ministru delibera hodi fó kompeténsia ba Sentru Integradu Jestaun Krize hodi asegura, ekipa apoiu ba Ministériu Saúde oinsá mak atu aselera prosesu vasinasaun porke imi hotu hatene katak prosesu vasinasaun hasoru difikuldade barak, difikuldade ita la hatene, ladún iha kooperasaun, husi komunidade ka?, ladún iha pro-atividade husi Ministériu Saúde”, dehan Aluk ba jornalista sira iha palásiu Governu, tersa (25/01).
Tanba vasina hamutuk iha rihun-200-resin ne'e mak la konsege utiliza ba sidadaun sira iha Timor laran tomak, maibé seidauk identifika nia kauza lolos ba atraza vasinasaun refere.
"Tanba vasina sira ne'ebé mak ita hetan hanesan doasaun kuaze 200 itál mil ne'e, ita la konsege utiliza hotu, ita seidauk hatene nia kauza prinsipál ne'e saída?. Tanba ida ne'e mak ekipa ne'e atu halo misaun ida ne'e, no misaun ida seluk mak, apoiu Ministériu Saúde liliu kona-ba kontrolu entrada e saída”, esplika nia.
Haree ba entrada no saida durante ne'e iha ema balun ne'ebé mak tama ladún iha kooperasaun Ministériu Saúde kona-ba implementasaun prevensaun Covid-19 ne'ebé mak sira estabelese, tanba ne'e mak iha nesesidade ekipa ne'e asume funsaun rua ne'e hodi apoiu Ministériu Saúde atubele implementa di'ak medida preventiva kona-ba moras Corona Vírus.
Ekipa sira ne'e mai husi Polísia Nasionál Timor-Leste (PNTL), FALINTIL-Forca Defeza de Timor-Leste (F-FDTL), Ministériu Saúde, Servisu Migrasaun no ekipa seluk. (*)