Xefe Departamentu Edukasaun Promosaun Saúde MS, Misliza Vital hatete, atividade ne'ebé sira halo tun ba baze hodi esplika ba komunidade atu uza máskara inklui fahe pamflitu atu evita vírus Variante Delta ne'ebé sai risku ba ema nia vida.

“Atividade ne'ebé mak pesoál sira saúde inklui ekipa voluntáriu sira tun ba baze halo sesnsibilizasaun avizu fó hatene situasaun Variante Delta ne'ebé agora enfrenta inklui mós prevensaun nian kona-ba uza máskara, fase liman no halo distansiamentu Sosiál”, dehan Misliza iha Kaicoli, segunda (26/07).

Aleinde ne'e la'ós sosializasaun de'it maibé mós fahe máskara ba konunidade sira ne'ebé lauza máskara no fahe mós pamflitu kona-ba prevensaun nian.

"Hanesan ita hotu hatene karik kazu, ita hotu akompaña iha mídia sosiál nomós informasaun hato'o husi sua eselénsia Ministra saúde kona-ba variante ne'ebé tama iha Timor entaun ita esforsu nafatin ona para oinsá atubele halo sesnsibilizasaun ne'ebé forsa liután iha área prevensaun”, afirma nia.

Sensibilizasaun mai husi ekipa husi Ministériu Saúde rasik husi pilar 2 liliu departamentu promosaun edukasaun saúde ho serbisu saúde Munisípiu Dili hamutuk ho sentru saúde sira plus NGO (Organizasaun Naun Governamentál) hanesan CVTL (Crus Vermella Timor-Leste) durante ne'e apoiu maka'as nomós Plan Internasionál, no seluk tan. (*)