"Infraestrutura ba pesoál sira importante tebes, se ita kolloka pesoal ida iha Baukau mak nia ba halo tratamentu la'o ain bainhira mak nia to'o ba, dala ruma pasiente bele hetan susar", dehan nia hafoin lansamentu ba kampaña nasionál integradu imunizasaun rutiña ba labarik sira iha área Kaisidu, Suku Tirilolo, Postu Administrarivu Baukau Vila, Munisípiu Baukau, Kinta (12/01).

Nune’e, Ministériu Saúde iha ona konsetu foun baa tinan 2023, planu atu halo konstrusaun postu saúde foun, inklui ho rezidénsia ba pesoal sira, nune'e bele hela permanente besik iha postu saúde hodi atende kazu emerjénsia.

Konstrusaun klínika ne'ebé uluk nian, dadaun kondisaun aat ona, nune'e ékipa sira iha ona tereñu halo lenvantamentu hafoin halo konstrusaun foun.

Tuir planu iha tinan 2023, atu konstrusaun klinika no rezidénsia foun ba pesoal saúde iha kada Munisípiu, ne’ebé balun sei hetan konstrusaun ida to'o rua, tanba kapasidade orsamentu la to'o.

Maibé, iha Diploma Ministérial antes ne'e, MS asina ona delega kompeténsia ho Autoridade Munisípiu atu rezolve problema infraestrutura saúde nian liuhusi Programa Dezenvolvimentu Infraestrutura Munisípal (PDIM), ne’ebé dezeñu konstrusaun nafatin husi MS.

"Iha Diploma Ministérial ne'ebé mak asina husi MS delegadaun kompeténsia ne'e liu-liu ba infreastrutura sira ne'e, balun bele rezolve ho PDIM", nia hatete.

Enkuantu tinan-2023, Governu preve orsamentu hamutuk tokon US$56 ba MS hodi aloka ba saláriu, bens servisu, kapital dezenvolvimentu.

"Ne'ebé ami sei fahe, la'os ba Munisípiu ida de'it, maibé kada Munisípiu ami identifika ida ne'ebe mak nesesidade liu, ami sei aloka atu bele halo konstrusaun", nia informa

Enkuantu, Munisípiu Baukau iha postu saúde 30, sentru saúde 9, ho totál pesoal saúde hamutuk 354. (*)