“USAID nia atividade sustentabilidade sistema saúde sei ajuda Ministériu da Saúde, Institutu Nasional Saúde (INS) no instituisaun sira seluk, hodi dezeñu no maneja kualidade servisu saúde ne'ebé di'ak ba Timoroan hotu”, dehan Embaixadór Estadus Unidaus Amérika (EUA) iha Timor-Leste, Kevin Blackstone hafoin halo lansamentu ba Sustentabilidade Sistema Saúde iha Otél Novu Turízmu, Lesidere, sesta (02/07).

Lansamentu husi sistema ne'e hodi ajuda garante Timoroan sira bele iha asesu ne'ebé di’ak ba servisu saúde nian liuhusi funsionamentu sistema saúde nasionál ne'ebé di'ak.

Iha programa sustentabilidade ba Sistema Saúde iha TL ne'e USAID apoiu orsamentu ho valór millaun UU$15,6, ne'ebé sei foka ba dadus hod informa kona-ba desizaun no aumenta finanseira ba saúde ne'ebé di'ak.

"Sistema saúde ne'ebé forte importante tebes hodi nasaun bele prepara no apar ho pandemia no hasoru dezafiu seluk ne'ebé parta saúde sira hasoru”, hatete Embaixadór Kevin.

Iha fatin hanesan, Ministra Saúde (MS), Odete Maria Freitas Belo hatete, programa lansamentu ne'e iha relasaun duni asuntu saúde nian, tanba ko’alia kona-ba atu haforsa sistema saúde ne'ebé mak sustentável.

“Prontu, durante ne'e ita hadi'a, ko’alia nafatin kona-ba hafors sistema saúde, maibé ita haree oinsá atubele haforsa, maibé atu sustein ne'e halo nusá tanba ko’alia kona-ba saúde automatikamente ministériu da saúde, ita mak na'in ba saúde, entaun, sira labele sevisu mesak, sira tenke konvida ita atubele akompaña sira-nia atividade sira e saida mak sira atu halo iha prpgrama ida ne’e”, dehan Odete.

Durante tinan barak nia laran, governu liuhusi MS servisu hamutuk ona USAID, tanba sira-nia programa haree liuba oinsá atu haforsa servisu primária nian.

“Ha'u hanoin katak, ida ne'e iha ita-nia planu estratéjiku, no kada tinan, ita sempre tau hanesan prioridade. Entaun, ho sira-nia apoiu ne'ebé mak iha, la sees husi ita-nia programa, la sees husi ita-nia prioridade ne'ebé mak tinatinan ita sempre tau”, haktenik nia.

Tanba ne'e garante ho programa husi USAID ne'e, bele ajuda MS hodi hametin sustentábilidade ba sistema saúde ne'ebé bele fó benefísiu ba populasaun sira hotu iha TL. (*)