Iha loron kuarta (30/06), maizumenus tuku 14:42, mosu kazu fatál ida ba inan feton Hilária de Jesus (73) mate, hafoin simu Vasina AstreZeneca iha Aldeia Olo-Olo, Suku Lour, Postu Bobonaru, Munisipiu Bobonaru.
Iha loron ne'ebé hanesan, mosu mós kazu identiku ne'e iha Suku Luilubu, Postu Administrativu Vemasse, Munisipiu Baukau, ne’ebé rezulta sidadaun mane ida ho naran Armando da Costa, mate hafoin simu Vasina AstreZeneca.
Maske Ministra Odete konsidera kazu refere seriu, maibé seidauk bele seidauk bele esplika ba públiku, tanba sei hein informasaun ho baze.
“Ha'u hatene kazu ne'e sériu, sé mak dehan kazu ne'e la sériu. Hakarak husu ba imi (jornalísta). Sé mak dehan kazu ne'e la sériu, kazu ne'e sériu, maibé la'ós atu hatán agora. Ha'u tenke hatán buat ruma ne'ebé mak ho baze, ho relatóriu ne'ebé mak iha. Entaun, ha'u mós apela ba imi (jornalísta), ho kazu ne'ebé mak iha ne'e, ita labele habelar informasaun ne'ebé mak tuir loloos seidauk klaru, liliu ba ita-boot mídia sira”, dehan Ministra Odete iha Otél Novu Turízmu, Lesidere, sesta (02/07).
Bainhira husu kona-ba ho kazu ne'e MS iha ona hanoin atu hapara vasina ba sidadaun sira, maibé seidauk ko’alia publikamente atu hapara vasina, tanba seidauk iha prova ruma kauza husi ema nia mate.
“Ita seidauk ko’alia kona-ba suspensaun tanba laiha klareza. Laiha, ami la hanoin atu suspende vasina ida ne'e, tanba ita seidauk hatene dehan vasina ida ne'e mak oho ema ka ema ne'e iha moras seluk. Ita tenke haree. Di'ak liu ha'u la ko’alia ida ne'e”, deklara Odete. (*)
