“Maski insidénsia nasionál no iha Munisípiu Dili, Baukau ho Manatuto reduz ba beibeik, insidénsia ohin (27/06) nian hatudu katak Munisípiu Dili nafatin iha risku bo’ot liu atu populasaun hetan da’et & hada’et tutuan vírus SARS-CoV-2”, informa Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo, liuhusi konferénsia imprensa, domingu (27/06).
Tanba ne’e média (rata-rata) iha loron 27 fulan-juñu, husi insidénsia Covid-19 iha Timor-Leste durante loron 7 ikus mak 3,6/100 mil abitante, enkuantu ba de’it Munisípiu Dili 8,2/100 mil abitante.
Haree ba evolusaun surtu Covid-19 iha teritóriu tomak indikadór ida ne’ebé matenek-na’in epidemiolojia nian uza, mak insidénsia, atubele hatene surtu ida ninia evolusaun, nomós surtu ne’e aumenta ka diminui.
Iha konvensionalmente insidénsia sukat totál kazu foun, kada loron, pur 100 mil abitante, no hatudu risku ne’ebé populasaun iha atu hetan da’et moras ida. (*)