Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo hatete, dadus jerál ne’ebé rejista iha totál kazu konfirmadu kumulativu (sura husi 21 fualn-marsu tinan 2020) hamutuk 1657.

“Kazu detetatu foun ne’ebé relata iha dia 22 Abril 2021 hamutuk 148 (iha Dili 118, iha Munisípiu seluk 30). Iha mane 79, feto 69, no asintomátiku 141 (95,2%) ni sintomátiku 7”, dehan Rui liuhusi Zoom Conference, kinta (22/04).

Husi totál kazu detetadu foun 62 (41,8%) mak deteta tanba halo teste ho razaun atu halo viajen ba Munisipiu hafoin deteta pozitivu.

Maske nune’e, sira ne’ebé rezultadu teste pozitivu, maioria sira-nia hela fatin, iha duni cluster sira ne’ebé iha kazu detetadu barak, tanba ne’e totál kazu detetadu foun 37 (25%).

Haree ba kazu rekuperadu ne’ebé ralata iha loron 22 fulan-abril 2021 hamutuk 35. Iha mós kazu ativu hamutuk 862.

Husi loron rua nia laran, Laboratóriu Nasionál Saúde halo 1218 testes PCR, ho detalladu hanesan vijilánsia sentinela 48, rastreiu ba kontaktu (Contact tracing) 130, rastreiu aleatoriu (Random Screening) 362, viajen sai husi serka sanitária Munisípiu Dili 605, viajen internasionál 28 no follow up iha kuarentena 4.

Husi evolusaun surtu Covid-19 iha Munisípiu Baukau 4, Manufahi 26, maibé Munisípiu sira seluk inklui RAEAO la rejista kazu iha oras 24 nia laran.

Iha loron 22 fulan-abril tinan 2021, izolamentu Vera Cruz iha kazu detetadu na’in-15. Iha área obstetrisia na’in-3, medisina interna na’in-9, pediatria 3.

Haree ba sira na’in-3 iha obstetrisia, kategoria moderadu hotu, sira-nia kondisun estável. Sira na’in-9 iha medisina interna, 2 grave, 7 moderadu no na’in-2 grave, 1 uza ventiladór, 1 uza CPAP (Continuous Positive Airway Pressure).

Kazu 3 pediatria, 1 moderadu, na’in-2grave no na’in-2 grave uza CPAP, no ida moderadu uza oxijéniu ho kanula.

“Informa mós katak ohin, iha Munisipiu Dili iha tán óbitu 1. Feto, idade 60 anos, konfirmadu pozitivu SARS-CoV-2 iha dia 19 de Abril de 2021, iha Emerjénsia HNGV, ho CT (cycle threshod): N2 gene 31,7; E gene 30,1”, afirma nia.

Matebian hela iha Lahane, Dili, ho istória isin-manas ho mear besik semana ida molok mai Emerjénsia HNGV, no mós istória tensaun-a’as, ho diabete ne’ebé la kontroladu.

Iha Diagnóze traballu iha Emerjénsia HNGV, Acute Respiratoric Distress Syndrom (Sindroma insufisiénsia respiratória aguda).

Tanba pozitivu SARS-COV-2, kazu ne’e konsideradu COVID-19 kategoria grave, no ekipa konjunta saúde deside enkamiña ba izolamentu Vera Cruz, hodi hahú tratamentu tuir protokolu médiku ne’ebé Timor-Leste adopta, inklui utiliza ventilasaun asistida liu husi CPAP (Continuous Positive Airway Pressure).

“Ohin 22 de Abril 2021, dadersan maizoumenus 08H25, pasiente i’is kotu. Ninia rezultadu test PCR post-mortem: Pozitivu SARS-CoV-2 ho CT (Cycle Threshold). N2 Gene 33; E Gene 35.

Familia matebian deside atu hakoi iha semitériu públiku Bekussi, no ekipa konjunta funeral nina, husi Ministériu Saúde, MSSI ho MAE sei apoia tuir protokolu ne’ebé hala’o iha funeral ida iha semana kotuk, hodi nune’e bele minimiza risku atu mosu kontájiu virus husi matebian nia isin ba fali ema seluk. (*)