Reprezentante UNICEF iha Timor-Leste Scott Walery dehan, to’o ohin loron Covid-19 sei sai nafatin infeksaun global ne’ebé daet bae ma millaun ida kada loron.
Tan ne’e, importante tebes atu kada ema halo prevensaun liu husi kumpre matadalan hirak ne’ebé OMS no MS fó sai ona.
"Ha'u hakarak fó hanoin ba ita hotu atu nafatin halo tuir matadalan ba prevensaun Covid-19 nian, tanba (Covid-19) sei sai infesaun global ne'ebé kauza ema milliaun ida kada loron, tanba ne'e ita tenke atensaun nafatin," dehan Scott liu husi nia diskursu iha kolókiu nasionál kona-ba vizilánsia no resposta mortalidade inan no oan iha Timor Leste, iha Hotel Novu Turizmu, Dili, Sesta (10/07).
Tuir dadus mundial kona-ba Covid-19 ne’ebé www.tempotimor.com asesu, to’o iha Sesta (10/07), ema ne'ebé konfirmadu pozitivu Covid-19 hamutuk na’in 12.169.400, sira ne'ebé rekopera na’in 6.696.322 no sira ne’ebé mate na’in 552.104.
Aleinde kona-ba Covid-19, Scott mós fó hanoin kona-ba mortalidade inan no oan iha Timor-Leste.
"Ita hotu tau forsa hamutuk, ita bele reduz mortalidade kosok-oan foin moris no hadi'a kualidade servisu saúde ba inan no labarik sira,” dehan nia.