"Hakarak esplika mos ba púliku katak prosesu desinfesaun, iha sorin ida hanesan deskontaminasaun hodi halakon ka oho mikro-organizmu hanesan vírus no bakteria, iha sasan ka objetu in-animadu, uza krezol pursentu lima (5%). Iha sorin seluk, atu oho mikro-organizmu ba ema nia isin lolon, normalmente uza antiséptika hanesan, álkool, betadin no seluk. Tantu Produtu kímiku ne'ebé uza ne'e la hanesan, tanba ida ne'e, OMS la autoriza halo desinfesaun ba ema nia isin, tanba nia impaktu ba ema nia saude, liu-liu bele hamosu iritasaun iha kulit, matan, ibun nomos iha vias respiratórias," Explika Rui Araújo liu husi konferénsia imprensa, Kinta ne'e, iha Sala Situasaun Sentru Konvensoens Díli (CCD) sigla iha portugés.

Eis-Ministru Saúde ne'e akresenta, desinfesaun ne'e, bele halo de'it ba iha fatin no sasan ka objetu movel no imovel sira 

"Fatin sira ne'ebé normalmente halo desinfesaun mak, kuartu, odamatan, didin, armáriu, meza, kama, haris fatin ho nia aredór sira, varanda, fatin lixu no lixu sira, molok atu lori ba soe ka sunu iha insineradór," dehan Nia 

Dadaun ne'e, prosesu desinfesaun halo mos iha Fatin kuarentena, fatin izolamentu, nomos transporte sira ne'ebé halo sirkulasaun tama no sai iha lokál kuarentena no izolamentu.