Eskola ne'ebé hahú implementa férias mak Universidade Nasional Timor Lorosa'e (UNTL), ne'ebé fó tempu fulan ida ba estudante sira atu ida-idak hela iha uma hodi akompaña prosesu liuhusi online.

Bazeia ba sikulár ne'ebé hasai husi Reitór, maka UNTL hasai ona informasaun katak durante fulan ida hahú husi 24 Marsu 2020 to'o 24 Abríl 2020, estudante sira sei tuir prosesu aprendijazen husi uma.

Nune'e, Eskola 4 Setembru UNAMET mós hasai ona avizu ba estudante sira atu hela iha no kuida nafatin saúde.

Diretór Eskolah Ensinu Sekundária 4 Unamet, Sérgio dos Santos da Cruz, husu ba estudante sira atu kompleta mateira no kuida saúde.

"Atividade iha semana ne'e nia-laran haruka estudante sira estuda, buka atu kompleta matéria sira ne'ebé falta," dehan nia, ba www.tempotimor.comvia telemóvel, Segunda (23/3).

Sergio hateten, prontu ezekuta orden mezmu Iha kalendáriu akadémika la hakerek, maibé tanba Ministériu Edukasaun fó sai ona despaxu férias relasiona ho Covid-19.

"Tenke submete ba superiór nia orientasaun no depende ba situasaun tanba relasaun ho ema nia vida, matenek ita sei buka maibé ita-nia vida ne'e lakon-lakon ona," dehan Sergio.

La'ós ne'e de'it, sentru formasaun iha Dili laran mós hahú implementa férias. Hanesan kursu lian iha LELI, hahú implementa ona férias ba formasaun sira hahú loron 23 Marsu to'o 30 Marsu.

Entertantu, antes ne'e Ministériu Edukasaun fó sai desizaun hodi suspende atividade aprendizajen eskolár durante semana ida hafoin Timor-Leste iha suspeitu ida pozitivu moras Covid-19.

Maski nune'e, iha estudante balun iha Dili no munísipiu sira kontinua ba eskola. No mós iha balun lakohi ba eskola tanba ta'uk Covid-19. (*)