Hafoin konfirmadu deteta ona suspeitu ida iha Timor-Leste pozitivu ba moras Covid-19, Governu iha maneira prevensaun ba moras pandemia Covid-19, hanesan meius atu satan para Covid-19 labele aumenta ba bebeik. Tanba ne'e, liuhusi Xefe Governu, Taur Matan Ruak, fo sai metode lima ne'ebé sai matadalan prevensaun Covid-19.

Kuidadu Ijiene: labele kumprimenta malu liuhusi kaer liman. Labele rein malu. Fase liman ho sabaun no tau maskra bainhira sai ba li'ur ka halo atividade.

Interdisaun: bandu rai sira ne'ebé hetan moras Covid-19 no bandu sira atu tama iha Timor-Leste, karik tama ona mós presiza semana rua atu halo izolamentu to'o semana haat.

Restreiu: atu identifika ema iha moras Covid-19 ka lae, daudaun ne'e governu halo iha fronteira terrestre no aeroporto. Maski nune'e, Timor-Leste seidauk halo teste massal katak restreiu (identifika) iha fatin públiku para hatene keta moras ne'e daet ba ema barak ona ka lae.

Izolamentu: ema sira ne'ebé infetadu, katak bainhira deteta ona ema iha sintoma Covid-19, entaun presiza izola iha fatin izolamentu para fo asisténsia. Kuidadu intensivu liuliu sira ne'ebé mas vulneravel, liuliu sira ne'ebé asma, tensaun. Dadaun ne'e guvernu perpara fatin tolu hanesan Formoza, Vera Crus no Tibar, mas governu mos buka aternativa hanesan Sentru Konvensaun Dili (CCD) no otél sira.

Distansiamentu Sosiál: bandu ema labele lao ba-mai, hotuhotu iha uma deit no labele halibur malu, movimentu labele iha, maibé ne'e liga ba estadu emerjénsia.

Husi metode 5 ne'ebé governu aplika, públiku hein mak pontu 5 "distansiamentu sosial", maibé ne'e aplika bainhira Prezidente Repúblika dekreta Estadu Emerjénsia hafoin simu pedidu husi Governu no rona tiha Konsellu Estadu no Seguransa no hetan aseitasaun husi Parlamentu Nasionál.

Maski nune'e, públiku mós presiza aplika ona prevensaun hanesan númeru 1 husi metode 5 ne'ebé governu liuhusi Ministériu Saúde, inklui Organizasaun Saúde Mundiál (OMS) fó sai katak prátika "kuidade ijiene".

Covid-19 katak, virus respirátoriu ne'ebé da'et husi kontaktu ema infetadu, ezemplu me'ar ka fani, kabeen ka inus been.

Tamba ne'e, importansia atu ema hotu prátika ijiene, tuir metode ne'ebé www.tempotimor.com asesu hanesan uza maskra, fase liman ho sabaun ka uza desifentante alkól, bainhira me'ar ka fani taka inus ho lensu ka liman sikun, evita hakbesik ba ema ne'ebé fani ka inus metin, tein naan ka manutolun to'o tasak, hadook aan husi animál sira ne'ebé laiha protesaun. (*)