“Ha’u hanoin pasiénte lubuk ida sei trankadu hela Timor iha Hospital Nasionál Guido Valadares (HNGV) seidauk transfere ba rai liur, maibé ema otonomista ida nia-oan uluk DPR (Dewan Perwakilan Rakyat Republik Indonesia), Armindo Mariano nia-oan rasik ne’e tranfere lalais de’it, agora nia halo hela tratamentu iha rai-liur”, Deklara Deputadu PLP Noé iha Plenária Parlamentu Nasionál, tersa (28/06).
Deputadu ne’e kestiona, veteranus barak mak baixa hela iha ospitál maibé informasaun dehan ema Indonézia nia-oan ida ba halo tratamentu iha rai-liur.
“Kestiona oituan agora ita-nia veteranus barak mak baixa hela iha ne’e mate tan tiha iha ne’e mós ita la haruka agora ita-nia otonomista nia-oan ida mai ita transfere lalais de’it ne’e saida mak ne’e”, afirma nia.
Tanba ne’e, husu atu tau matan ba veteranus sira-nia saúde, bainira hakarak dignifika nasaun, no Ministériu relevante tenke haree situasaun ne’e.
“Señor Ministru fó hatene tok ba Ministériu Saúde konfirma tok situasaun ida-ne’e. Se ita dehan veteranus ne’e mak ai-rin ba nasaun Timor-Leste ninian maibé sira moras de’it mós ita la tau matan barak los mak agora antrian hela iha ne’e maib’e atu transfere lalais ba rai liur ne’e susar oituan’, hatete nia. (*)