“Informasaun relatóriu Hospital Referál Maliana ho Hospitál Nasionál Guidu Valadares sira prepara hela, maibé informasaun prelimináriu pasiente ida ne’e mai husi Lolotoe sira mai depois halo tiha tratamentu konsulta iha Hospital Referral Maliana nian, la’os tanba gravida mak mate, maibé ho komplikasaun moras, nia ho moras epatitis B no mos acities B iha kabun mós”, dehan nia hafoin reuniaun Konsellu Ministru iha Palasiu Governu, kuarta (08/02).

Alende ne’e, nia mós rejeita Deputada Adriano Nacimento nia deklarasaun katak, prosesu transferensia mai Dili la akompaña husi pessoal saúde sira, tanba iha kada ambulansia ne’e Ministériu Saúde koloka kedas pessoal saúde ba ambulansia ida hodi akompaña pasiente transferensia sira mai Dili.

“Kada ambulansia ne’e iha pesoal saúde, rumoris ne’ebé dehan, so kondotór de’it ne’e laloos”, nia rejeita

Tanba bebe ne’ebé iha inan nia isin foin halo ba semana 28 depois mai partu iha Sentru Saúde Atabae ho kondisaun moris, nune’e kontinua viajen mai Dili, maibé labarik ikus mai mate iha Likisa parte Aipelu nian.

“Bebe ne’ebé moris ne’e nia kilo 1.3 kg de’it, entaun sira kontinua ho ambulansia refere mai Dili, to’o iha Likisa pasiente (Bebé) ne’e mate, tanba nia seidauk ho idade ne’ebé moris”, nia hatutan.

Maibé bebe nia inan ne’e to’o tiha mai iha Hospital Guidu Valadares (HNGV) Dili mak hakotu iis, tanba moras komplikadu.

Maske to’o agora relatóriu kompletu seidauk publika, maibé hein espesialista sira sei relata ba publiku. (*)