Ministru Prezidénsia Konsellu Ministru (MPKM), Fidelis Manuel Leite Magalhães hatete, renovasaun daruak ba medida exesionál no temporária ba vijilánsia sanitária ne'e hodi hatán ba pandemia moras COVID-19 nian, ne’ebé prorroga vijénsia husi artigu 3 Lei n. 24/2021 nian, loron 19 fulan-novembru. Ho alterasaun ida-ne’e, medida exesionál sira ne’e prorroga ba periodu loron 120.

“Tanba ne'e mak ohin dekreitu lei ne'e ita hatur, tenke fó nota esplikativu ida liliu iha preamblu proposta ne'ebe Governu husu ba parlamentu tenke hatur mós dadus sira, ikus liu situasaun pandemia nian”, dehan Fidelis, iha Palásiu Governu, kuarta (15/06).

Iha artigu 3, loron 120 ne'e primite ba Governu hola medida sira bainhira vírus pandemia COVID-19 ne'e sei iha.

“Governu husu ba Parlamentu Nasionál atu autoriza 120 dias para Governu iha kompeténsia ne'e hodi hein hela, karik sei iha moras iha aumenta ruma karik, ita iha medida legál sira mak fó kbi’it mai Governu atu halo atuasaun sira”, afirma nia.

Maibé ida ne'e mós la presiza atu halai fali ba Estadu Emerjénsia karik iha situasaun ne'ebé mak moras aumenta. Maibé iha instrimentu legál sira para bainhira kazu COVID-19 aumenta karik Governu iha medida legál hodi uza atu hala’o atuasaun.

“Mas ita-boot sira bele dehan moras la aumenta ona?. Ita-nia mós hatudu katak haree kondisaun di’ak, ita hotu moris kuaze normál espera ida-ne'e kontonua nafatin. Maibé instrumentu legál sira ne'e ita presiza tau para jaga-jaga nafatin, karik iha situasaun ladi’ak ruma, moras aumenta karik, ita iha medida ruma Governu bele uza hodi halo atuasaun sira”, esplika Fidelis. (*)