Tuir informasaun ne’ebé www.tempotimor.com asesu iha pájina Palásiu Sinza, kuarta (15/06) katak, Ministra Saúde (MS), Odete Maria Freitas Belo partisípa iha selebrasaun ne’e, hatete komemorasaun Loron Mundiál Doasaun rán ne'e hanesan dalan ida atu hatudu ba Timoroan hotu nafatin iha konsiénsia hodi bele ajuda rán turuk ida atu tulun ba ema ne'ebé presiza.

“Bainbain loron 14 juñu Óspital Nasionál Guido Valadares liuhusi nia Departementu Banco de Sangue sira komemora nia loron doasaun rán nian, ita uza nafatin oportunidade ida-ne'e hodi partisípa ho ita-nia prezensa ita hatudu ba ita sira ne'ebé Timoroan atubele iha konsiénsia, jeneroujo nomós solidariedade fahe nafatin ita-nia rán turuk ida ba ita-nia maluk sira ne'ebé mak presiza”, dehan Ministra Odete iha HNGV, tersa (14/06).

Tanba rán la bele sosa no la produz maibé ba ema ne'ebé atu halo doasaun rón mós tenke haree ba nia saúde wainhira saudável mak bele disponivel atu halo doasaun.

“Tuir OMS nia númeru hatete 0.1 to'o 0.3% husi totál populasaun, se ita multiplika rán ida-ne'e mak tenke iha ita-nia armazen, infelizmente ita seidauk iha ida-ne'e, seidauk iha tanba rán ne'ebé iha ita bele kobre de'it 23% husi ema ne'ebé mak presiza, sikinifika katak pursentu 70 resin ne'e dalaruma ema mai rán laiha ou dalaruma ema mai ita fó atraza tenke ba foti tenke hasai rán no wainhira ita fó rán, primeiru ita mós tenke iha saúde di'ak, dalaruma ita disponivel sai donor tetap maibé ita tenke haree mós ita-nia kondisaun no ita mós tenke haree wainhira ema ne'ebé mak mai hasai rán, to'o iha ósptal iha tempu hasai rán, sira bele duni fó rán ga la’e, ne'e ita ko'alia kona-ba disponibilidade rán nomós asesu ba rán ne'e oinsá”, afirma nia.

Tanba ne’e husu ba Departementu Banco de Sangue atu fahe informasaun ba Instituisaun sira nomós ema ida-idak hodi bele ajuda fó rán ba óspital maibé presiza mós muda fatór ne'ebé ladún di'ak wainhira fó atendementu ba ema ne'ebé mai fó rán hodi tulun ema seluk nia vida.

“Ha'u espera katak Departementu ida-ne'e, halo esforsu liután atubele fahe informasaun ba instituisaun sira, ba ema ida-idak katak ita hothotu tenke iha hanoin konsiénsia rasik atu mai fó rán ba ita-nia departamentu ida-ne'e, maibé sira mós tenke prontu dalaruma ita mai mós sira la prontu atu hasai rán, entaun sira mós tenke muda hadi'a sira-nia jestaun atu nune'e fatór sira ne'ebé mak iha ne'e liliu la ajuda atubele iha rán iha ita-nia fasilidade ida-ne'e sira bele kompleta”, hatete nia.

Iha selebrasaun loron Mundiál Doadór Rán hetan partisipasaun husi Reprezentante Organizasaun Mundiál Saúde (OMS) iha Timor-Leste, Arvind Mathur, Diretór Ezekutivu HNGV, Alito Soares, Reprezentante CVTL, F-FDTL, PNTL no entidade sira seluk. (*)