Tuir informasaun ne’ebé www.tempotimor.com asesu iha pájina Palásiu Sinzas, kuarta (01/06) katak, dadaun ne'e kompaña Daloveya Unipesoál, Lda halo hela mobilizasaun prosesu ba reabilitasaun eis-ospitál ne'e ho orsamentu fundu infraestrutura nian ho númeru kontratu RDTL-MS-C19-DNA-DC22-019.
Ba durasaun tempu projetu ne'e rasik fulan-ualu hahú husi fulan-abril no sei remata iha fulan-novembru tinan 2022.
Ba projetu ne'e tama mós iha kritériu prioridade konstrusaun ospitál foun iha Bidau Toko-Baru atuál Ospitál Nasionál Guido Valadares-Dili.
Tuir planu ministériu saúde nian wainhira pandemia globál COVID-19 laiha ona mak ospitál ne'e sei utiliza fali ba fatin tratamentu kardiaku ka tratamentu ba ema ho moras fuan.
Antes ne'e, iha Primeru Governu Konstitusionál fatin ne'e utiliza sai hanesan rezidénsia ba Brigada Medico Cubano wainhira inisia Misaun iha Timor-Leste.
Iha biban ne'e, Ministra Saúde identifika mós uma antigu sira seluk iha Lahane ne'ebé tama mós iha kritériu prioridade atu halo reabilitasaun iha tinan 2022 ne'e. (*)