Kordenadóra programa moras fuan ONG Maluk Timor, Juliana dos Santos Sarmento, hatete, peskiza kazu rematizmu moras fuan ne'ebé durante servisu hamutuk ho espesialista husi Austrália halo iha teritóriu nasionál konsege identifika ho pursentu 3 iha tinan-2018, konsidera pursentu refere atinji númeru aas.

"Kazu (rematizmu moras fuan) ne'ebé ami rejista ne'e, kuaze 400 ona, maioria ne'e tinan-5 to'o tinan-15, inklui mós idade 50 ba leten mós iha hotu," dehan nia iha Reamare, tersa (31/05) .

Kazu refere kauze husi baktéria estreotatokus, baktéria ne'e mós moris iha kualker fatin, bazeia ba ijene ne'ebé ladun di'ak, ár uma laran ne'ebé lafresku, ema nia ijene mós ladun di'ak liu-liu parte ibun laran lakose nehan mak dezenvovle baktéria iha ibun laran hodi tun ba garganta hamosu isin manas akompañia ho garganta moras, liman ain kolen.

"Ita la halo tratamentu mak sei tun ba ita nia fuan laran, entaun bele impaktu ba ita moras fuan, sé ita la halo prevensaun bele to'o fali komplikadu bele struk falla liu mak pasiente bele lakon vida," nia informa

Tanba ne'e, husu komunidade enjerál atu garante nafatin ambiente ne'ebé mós no saúdavel, atu  bele fó imunidade di'ak hodi prevene ba moras fuan.

Médiku Óspital Rejionál Eduardo Ximenes (HoREX-sigla portugés), Cristina Esperança Gusmão, informa, dadaun Timor-Leste mós infrenta ona problema moras fuan, tanba kauza husi ambiente ne'ebé laseguru.

"Iha HoREX 100-ital (rejistu) hanesan ne'e, iha labarik ki'ikoan no mós ema boot, dala ruma ita nia komunidade laiha koñesementu labarik sira mai ho isin manas kakorok moras, maibé sira hanoin ne'e, baibain entaun sira husik inflasaun ne'e iha," nia informa

Kona-ba labarik idade ki'ik ne'ebé hetan moras fuan mak la halo tratamentu antibiotiku ou injeksaun nian sedu bele mate.

Tanba ne'e, husu pasiente ne'ebé hetan moras fuan, prezisa halo tratamentu rutiña tuir médiku sira haruka kada fulan, nune'e bele halo prevensaun. (*)