“Durante ne’e tinan 20 ona, servisu hamutuk ho Ministéiru Saúde hodi fó tratamentu matan ba pasiente ho problema matan, inklui leno, operasaun no tratamentu, to’o agora konsege fó ona tratamentu ba pasiente liu rihun atusida”, dehan Médiku Espesialista Matan husi RACS Global Health, Manoj Sharma, hafoin audénsia ho Prezidente Repúblika (PR), José Ramos Horta, iha Palásiu Prezidensiál, Bairropite, kuarta (01/06).

Dadauk ejisténsia RACS iha Timor-Leste kompleta ona ba tinan, no servisu ne'ebé durante ne'e sira halo oinsá implementa programa matan nomós kapasita médiku timoroan sira iha nível nasionál to’o munisípiu.

Ho rezultadu servisu hirak ne'e, sira mós atualiza ba Prezidente Repúblila, liliu kona-ba kapasitasaun iha médiku jerál sira hodi hasa’e sira-nia nível edukasaun nomós post gradusaun diploma iha área matan.

“Ha’u mai primeiru Timor-Leste iha 2013, momentu ne’ebá espesialista matan timoroan foin na’in-ida maibé agora iha ona timoroan espesialista matan na’in-lima no iha mós post graduasaun diploma matán na’in-hitu ou ualu”, afirma nia.

Diretora Saúde Global, Philipa Nichlonson hatete, kona-ba enkontru ne'ebé halo ho Prezidente Repúblika ko’alia liu kona-ba programa matan iha Timor-Leste nia progresu.

Husi progressu servisu ne’ebé iha inklui mós difikuldade oioin ne'ebé presiza hetan apoiu oinsá iha kapasitasaun matan mós ba pesoál enfermeiru sira iha Timor-Leste, hasa’e kualidade pesoál saúde hodi oferese servisu saúde matan ne’ebé ho kualidade ba komunidade.

Dadauk, akordu kooperasaun ne’ebé RACS hala'o ho MS ne'e atinje ona iha tinan tolu, mai implementasaun programa refere no sei ramata hodi hand over ka entrega fali ba Ministéiru Saúde atubele kontinua. (*)