Tempotimor (Dili)-Governu liuhusi Gabinete Apoiu Sosiedade Sivíl iha Auditoria Sosiál (GASSAS) kontinua halo parseria ho organizasaun sosiedade sivíl sira atu tau matan ba iumplementasaun dekretu lei kontrolu tabaku, tanba Governu halo asaun kontra tabaku ho dekretu lei ba presu no taxa.

“Governu produz ona dekretu lei, atu kontrolu tabaku iha fatin públiku, liuhusi VIII Governu produz lei ba presu, taxa tabaku nian, pur kilo ne'e $50, ne'ebé ita bele kobre liuhusi importasaun tabaku nian, nu'udar boa vontade VIII Governu atu halo prevensaun ba moras la-hada'et nian”, dehan Diretór GASSAS, Daniel dos Santos, iha salaun MSSI, Kaikoli Dili, kinta (24/03).

Tanba ne'e, reforsa polítika oinsá mak asegura sidadaun sira hotu bele kompri regulamentu sira kona-ba bandu tabaku iha fatin públiku, ne'ebé produz husi dekreitu lei ne'ebé iha.

“Governu limita rekursu tanba ne'e mak liuhusi gabinete apoiu sosiedade sivíl servisu hamutuk ho iha fundu transparénsia públiku, atu apoiu organizasaun sosiedade sivíl sira liuliu aliansa nasionál kontrolu tabaku, oinsá kontinua serbisu advokasia sira hodi kontribui ba dekreitu lei foku liuba artigu 5,6,7, kontrolu tabaku, kona-ba proibidu fuma iha fatin públiku”, hatete nia.

Gabinete Apoiu Sosiedade Sivíl husu ba públiku labele fuma iha fatin públiku, tenke tau sinál bandu fuma iha edifisiu públiku, entaun Governu labele kontrola to'o iha ne'ebá, tanba ne’e SASCAS parseria ho sosiedade sivil sira ho ANCT-TL.

Nune'e kontribui ba moras la-hada'et, ne'e presiza intervensaun husi Ministériu Saúde, hodi apoiu ba gabinete apoiu sosiedade sivíl.

“Implementasaun ne'e la'ós kabe de'it responsabilidade Governu nian, ne'e instituisaun hothotu, liuliu Ministériu Saúde, organizasaun sosiedade sivíl no komunidade rasik ita hothotu tenke iha konsiénsia, atu hapara fuma iha fatin públiku”, afirma nia. (*)