Ofisi’al Programa Promosaun Edukasaun Saúde ba vasina Pfizer Munisípiu Baukau, Abrão Pinto hatete, loron 01 fulan-abril tinan-2022, sei lansa vasina Pfizer doze daruak ba estudante sira.
"Dia 01 abril ita lansa vasina doze segundu ba ema 500-resin mak sei simu doze segundu iha abril," dehan Abrão iha kna'ar fatin, reamare kinta (24/03).
Hahú lansamentu ba vasina Pfizer faze dahuluk iha loron 11 fulan-marsu tinan-2022 to'o ohin loron, estudante na'in-3.319 mak simu ona vasina, ne’ebé kompostu husi mane 1.622 no feto 1.517.
Durante implementa vasina Pfizer iha Baukau ba estudante sira iha kolaborasun di'ak, inklui mós inan aman husi estudante.
Tuir alvu husi nasionál labarik idade-12 to'o 17 atu simu vasina Pfizer iha Baukau hamutuk rihun 19.559, maibé estudante na'in-16.420 seidauk simu vasina Pfizer doze dahuluk.
Nune'e, Diretór servisu edukasaun Baukau, Augusto Ornai Ximenes hatete, liuhusi reuniaun, kontinua orienta dirativas eskola sira iha Munísipiu Baukau atu fó hanoin ba estudante sira idade-12 to'o 17 partisipa iha vasina Pfizer.
"Ne'e la'os benefisiu ba ékipa saúde ne'ebé la'o tuir, maibé ne'e ita ne'ebé simu nia benefisiu, tanba covid-19 ne'e problema mundiál, tanba ne'e saúde mundiál, Ministéiru Saúde esforsu gasta osan barak ba programa ne'e, atu ita hotu livre husi moras aat ne'ebé invade mundu kuaze tinan-2 ona," nia hatete
Entertantu vasina Pfizer ne'ebé iha saúde Baukau hamutuk víal-2000 resin, maibé fahe ona ba postu saúde sira atu fó vasina ba labarik no estudante husi tinan-12 to'o menus idade-18. (*)