Desizaun Tribunál Rekursu la admitidu Kandidatu Prezidente Repúblika (PR) 2022-2027, Luis Alves Tilman, fó sai iha loron segunda (14/2), tanba la priense rekezitu kona-ba rekolla eleitorál atus-ida kada munisípiu.

“Rekursu tama horisehik. e Ohin la'e aban kolega Juis na'in-tolu bele deside”, informa Deolindo iha edifísiu Tribunál Rekursu, Kaikoli, kuarta (16/02).

Bainhira juis na'in-tolu deside ona kona-ba rekursu ne'e, Tribunál Rekursu sei hasai lista definitivu ba kandidatura sira foin bele halo sorteu.

“Sé desizaun marka lista definitivu hasai ohin, aban bele halo sorteu, sé lista defenitivu hasai aban, marka sorteu ba bainrua”, hatete nia.

Antes ne’e, Prezidente Tribunál Rekursu (TR), Deolindo dos Santos informa, Tribunál Rekursu la admite kandidatu Prezidente Repúblika (PR), Luis Alves Tilman tanba la prienxe rekezitu ne’ebé fó sai iha lei eleisaun prezidensiál no kandidatuta.

“Iha munisípiu tolu ne'e, kada atus-ida, atus-ida, mais la prienxe, tanba ne'e mak ninia lista la admitidu”, dehan Deolindo iha kna’ar fatin, Kaikoli, segunda (14/02).

Dadauk totál kandidatura ne'ebé aprezenta ona iha Tribunál Rekursu ne'e hamutuk 17, maibé husi totál hirak ne'e iha 16 mak admitidu, no ida la admitidu.

Ho ida ne'e, kandidatu ne'ebé la admitidu, Tribunál Rekursu sei fó prazu loron ida ba kandidatu ne'e atu rekore desizaun Tribunál Rekursi nian, hahú segunda (14/02) to'o tersa (15/02), maizumenus tuku 17:00.

“Siknifika katak ohin nia simu desizaun ne'e, nia bele rekore komesa agora to'o aban tuku lima, nia rekore ona entaun ne'e mak husi Tribunál Koletivu, Juis na'in-tolu sei haree fali desizaun ha'u-nian ne'e iha loron rua nia laran, atu foti desizaun, depois hotu tiha mak ita foin hasai lista defenitivu, no lista defenetivu sai tiha mak ita foin halo sorteu ba prosesu ida ne'e”, esplika nia.

Ba prosesu verifikasaun ne'ebé Tribunál Rekursu hala'o durante loron 10 nia laran, konsege deteta irregularidade barak maibé TR notifika kedas kandidatu sira hodi kompleta, inklui kandidatu Luis Alves Tilman ne'ebé mós konsege kompleta maibé la prienxe nafatin rekezitu kona-ba rekoilla eleitorál kada atus-ida iha Munisípiu Likisá, Vikeké no Manufahi.

Tuir Kalendáriu eleitorál ba eleisaun Prezidente Repúblika nian ne’ebé Governu públika iha loron 19 fulan-marsu 2022, ba markasaun eleisaun ne’ebé desfine loron 14 fulan-fevereiru 2022, desizaun Tribunál Rekursu nian kona-ba korresaun ba irregularidade kandidatura sira nian, no iha loron 15 mak interpozisaun rekursu ba koletivu Tribunál Rekursu nian kona-ba admisaun/rejeisaun ba kandidatura sira.

Ba desizaun kona-ba rekursu admisaun/rejeisaun kandidatura sira-nian (Tribunál Rekursu) iha loron 16 to’o 17, no Tribunál Rekursu fó hatene ba STAE no CNE kona-ba kandidatura sira ne’ebé admite ona ho definitiva iha loron 17.  

Nune’e, iha loron 18 to’o 20 fevereiru 2022, STAE fó-sai ba públiku kandidatura sira ne’ebé admite ona ho definitiva iha komunikasaun sosiál. (*)