“Durante ne'e investigasaun ladún la'o tanba ladún seriu la nakloke ba ema hatene, tanba ema sira ne'ebé serbisu iha Tribunál mós ladun justu, sira sei haree ema nia backround ne'e sé”, dehan Diretór Ezekutivu Luta Hamutuk José Alves da Costa, ba jornalista sira iha nia kna’ar fatin Farol, kuarta (16/02)
Tanba tinan barak Eis Prezidente Rejiaun Administrativa Espesiál Oekussi Ambeno (RAEOA), Mari Alkatiri promete, sei to'o lalais maibé to'o tinan 2022 Ró refere seidauk to'o iha Timor-Leste.
Kona-ba kazu ruma ne'ebé mak ema ki’ik hasoru tribunál lalais hodi investiga hodi hatama ba sela ho lalais maibé ema boot sira susar atu halo investigasaun.
“Sé por ezemplu mak ema ne'ebé fa'an ikan iha dalan ne'ebá, lori karreta la sengaja soke ema mós ne'e investigasaun lais loos no hatama ba kadeia lalais de'it no ema ne'ebé baku malu ho nia feen ne'e sira investiga lalais de'it maibé koruptór boot hanesan ne'e susar la halimar atu investiga tanba sira mós kesi ikun hela ba, tanba sira-nia power polítiku, ida ne'e mak la justu ne'e, Tribunál no jurista sira mak la justu ne'e ita atu fiar tan sé?”, afirma nia.
Luta Hamutuk haree iha influénsia polítika boot ba prosesu judisiáriu tanba ema sira ne'ebé mak lidera iha Justisa nomeia husi partidu polítiku.
“Entaun interese ka rasa belas kasihan ne'e iha hela de'it, ne'ebé sira la jujur ida, se loloos karik problema ida ne'e rezolve kleur ona, ema responsabiliza mós tama kadeia ona, ka mínimu ne'e lori Ró mai ona, até a data la iha”, hatete nia.
Komisáriu Komisaun Anti Korrupsaun (KAK), Sergio de Jesus Fernandes da Costa Hornai hatete, sei halo investigasaun klean ba orsamentu hamutuk dollár Amerikanu rihun $14 ne'ebé to'o oras ne'e Autoridade Rejiaun Administrativa Espesial Oekussi Ambeno (RAEOA) seidauk ezuta ba konstrusaun Ró Haksolok.
“Hanesan ita-boot sira haree katak, bainhira iha irregularidade konserteza, instituisaun sira hanesan autoridade polísial nomós autoridade judisiál sei halo serbisu atu halo medida”, dehan Komisáriu Sergio Hornai.
Tanba justisa vale no prevalese ba ema hothotu, entaun sira sei halo apura ba kazu sira ne'ebé mak, será ke ida ne'e loos ka laloos.
“Iha duni prejuizu ba Estadu ka la’e, iha duni abuzu de poder ka la’e, iha desizaun sira ne'e benefísia ba povu ka la’e. Entaun, buat sira ne'e tenke liuhusi investigasaun ida ke loloos, para ita bele deskonre verdade liuhusi nia provas, nomós ninia fatus sira, ita konstitui materia direitu sira hodi bele tulun ita-nia prokuradór sira atu halo, promove akuzasaun”, esplika nia.
Bainhira kazu kona-ba Ró tama ona ba kompeténsia KAK nian, sei halo prosesu investigasaun, maibé tanba serbisu ida ne'e sei iha interligadu ho autoridade judisiáriu sira hanesan Ministériu Públiku no Tribunál Kamára-de-Kontas nia kompeténsia, iha ne'ebé kada tinan halo auditória ba despeza Orsamentu Jerál Estadu nian iha programa Governu nian.
“Entaun, sei halo auditória ba iha ne'ebá. Bainhira auditória ne'e iha, atu labele iha over laping iha ita-nia prosesu sira, entaun ita tenke iha pasiénsia oitoan atu haree sasán sira ne'e hotu”, afirma nia.
Entretantu, iha loron 02 fulan-agustu2021 Prezidnete RAEOA, Arsénio Paixăo Bano informa, razaun sira seidauk halo ezekusaun ba orsamentu millaun $14 ba Ró Haksolok tanba, progresu negosiasaun ba Ró ne'e, seidauk la'o di'ak.
“Osan $14 milhões ne'e seidauk ezekuta, ita só selu kuandu progresu ne'e la'o, tanba ne'e mak ha'u dehan, progresu ne'e la'o di'ak, e ita-boot sira atu hatene progresu detalla la'o ho di'ak, ita foin mak hasai osan oitoan atu halo hotu negosiasaun ne'e", dehan Arsénio Bano. (*)
