Prezidente Tirbunál Rekursu, Deolindo Dos Santo hatete, dadauk formuláriu dijitál ka online ne'e, parte Tribunál Rekursu liuhusi tékniku no asesór sira kria ona, nomós hetan apoiu husi Teknolojia Informasaun no Komunikasaun (TIC) nasionál husi Gabinete Primeiru Ministru (PM) nian.
“Husi dijitál ne'e mak agora konklui ona servisu, e ohin ita halo lansamentu, apartir aban ba oin, sira ne'ebé lei hatete katak tenke ser presta deklarasaun mai supremu tribunál, se mak atu presta deklarasaun, mak Prezidente Repúblika, Prezidente Parlamentu Nasionál ho deputadu sira, no Primeiru Miniatru ho membru Governu sira hotu, nomós ema sira ne'ebé servisu iha KAK”, dehan nia hafoin halo lansamentu ba formulariu online ba deklarasaun rendimentu-bens no interese iha edifísiu Tribunál Rekursu, kinta (17/02).
Ba formuláriu online deklarasaun rendimentu-bens no interese ne'e estabelese bazeia ba lei númeru 7/2020, kona-ba Medida Prevensaun no Kombate Korrupsaun (MPKK).
Ho ida ne'e, Tribunál Rekursu iha loron kuarta (16/02) ofisialmente halo lansamentu ba formuláriu online ne'ebé sei oferese ba entidade iha instiuisaun Estadu atu deklara riku soin.
Tanba ne’e, fo apresiasaun ba tékniku sira liliu Teknolójia Informasaun no Komunikasaun ne'ebé fó ona apoiu ba Tribunál Rekursu hodi kria formuláriu ida ne'e.
Formuláriu ho meius online ne'e sei fó durasaun ba deklarante sira atu deklara sira-nia riku soin hahú husi loron kinta (17/02) to'o (06/03), maibé Tribunal Rekursu rasik mós preparadu hela atu ajuda instituisaun sira ne'ebé la kompriende.
Tanba husi formulariu ne'e maske konteudu simples hela maibé ne'e so ema hatene mak bele kompriende, no bainhira la kompriende ho di'ak sei iha difikuldade kona-ba prienxe. (*)