Ho situasaun ne’e, Xefe Governu manifesta nia solidariedade no fó korajen ba família afetadu sira, no orienta ona ba Ministériu relevante sira hodi halo intervensaun imediata ba apoiu família afetadu sira.

“Dadeer ne’e, ha’u rona rekadu kona-ba inséndiu iha eis Merkadu Komoro ne’ebé kuaze atinje uma komunidade sira nian besik 400 resin mak ahi-hán hotu, ha’u-nia laran triste no lamenta tebes rona notísia ida ne’e. Aproveita biban ne’e hodi ha’u-nia naran rasik no Governu nia naran, manifesta solidariedade ba família sira ne’ebé afetadu no husu atu korajen iha situasaun ida ne’e”, dehan Taur liuhusi Komunikadu Imprensa, kinta (29/07).

Entretantu Sekretáriu Estadu Protesaun Sivíl, Joaquim José Gusmão dos Reis hatete, dadaun ne’e sei prepara hahán ba komunidade vítima atubele hahán meudia nian hafoin kontinua hafoin oinsá bele halo attendimentu tuir mai.

“Iha ne'ebé afeita maka’as ba ita-nia komunidade iha merkadu Komoro ne'e, horikalan ita-nia ekipa bombeiru tun kedas mai só bele salva de'it iha ninin, klaran ne'e labele salva hotu kedas to'o ohin madrugada, e ohin ita tun mai iha kampu, e ita ko'alia ho ita-nia xefe suku xefe aldeia sira. Governu deside ona atu fó atendimentu uluk ba komunidade sira horikalan to’o dader seidauk hán mak deside hodi fó hán ba sira hafoin mobiliza tenda atubele hari’i iha fatin ne’ebé bele akomoda sira,". (*)