“Vítima ohin ha'u dehan tiha ona, tuir dadus provizoria ne'e família hamutuk agora dadaun ne'e iha atus-lima agora sofrementu iha uma laran ne'e 5.000-resin ne'e provizóriu”, dehan Xefe Aldeia 03, Zeferino Bras iha Eis merkadu Komoro-Dili, kinta (29/07).

Nune'e Vítima Inséndiu, Joaninha Ximenes Freitas hatete nia nunka salva nia sasán to'o lutu ba laen iha ulun mós ahi-hán hotu.

“Ha'u-nia osan ahi-hán murni ne'e hamutuk rihun-ida (1.000) ha'u tau iha kulsaun okos be ahi-hán tiha, hanesan bazeia ba ha'u-nia sasán sira ne'e ha'u buka moris ne'e husi tinan 2006 to'o mai iha ne'e hamutuk osan karik rihun-lima-resin ne'e ahi-hán totál tiha hotu, sasán sira hanesan kios, jelera obralan (OB), inklui Lutu ida ha'u tau ba ha'u-nia laran iha ha'u-nia ulun mós ahi-hán hotu tanba ida ne'e mak ha'u triste”, dehan nia.

Entretantu Sekretáriu Estadu Protesaun Sivíl, Joaquim José Gusmão dos Reis hatete, agora sei prepara ema hahán ba komunidade vítima ba hahán meudia nian.

"Iha ne'ebé afeita makas ba iha nia komunidade iha merkadu Komoro ne'e, horikalan ita-nia ekipa bombeiru tun kedas mai só bele salva de'it iha ninin, klaran ne'e labele salva hotu kedas to'o ohin madrugada, e ohin ita tun mai iha kampu, e ita ko'alia ho ita-nia xefe suku xefe aldeia sira, ita deside ona para ita fó atendimentu uluk ba komunidade sira desde horikalan ne'e, até ohin dader seidauk han ho ita-nia inan feton sira ho ita-nia inan isin-rua sira ne'ebé mak ita deside fó han tasak uluk iha meudia ne'e depois ita mós mobiliza tenda mai hari’i iha fatin rua iha ne'e hodi bele akomoda sira iha fatin ne'e”, hatete nia.

Hafoin tun direta, Ministériu Relevantes sira deside fatin CCYC (Comoro Child and Youth Center) atu koloka vítima inséndiu sira iha fatin refere, hodi atende ba nesesidade vítima sira-nian.

“Ita mós mobiliza sasán sira hanesan sanán bikan tasi sira, para sira bele loke ona dapur umun, ba sira para orsida kalan sira rasik bele organiza sira bele tein rasik, ita apoiu ai-hán ba sira”, dehan Joaquim. (*)