José ‘Samalarua’ Neves, Sekretáriu Ezekutivu ba instalasaun Komisaun Nasionál Justisa e Paz Timor-Leste nomós nu'udar adviser ba programa selebrasaun 25 anos Komisaun Justisa e Paz harii iha Timor-Leste hatete lia hirak ne'e ba jornalista. 

“Ami mai hato'o ba Prezidente Repúblika, prosesu preparasaun no realizasaun ne'ebé mak sei hala'o iha dia 3 de Agostu. Mas, preparasaun no diskursaun lubuk ida se la'o husi dia 3 de Agusto to'o Dezembru tinan ida ne'e,” hatete José Neves.  

Nia dehan, atividade hirak ne'e hahú ho Komemora 25 anus justisa e paz iha TL iha dia 3 de Agusto. Dioseze tolu mak hamutuk com insidente ho komemora mós 20 anos referendum TL. 

Tuir Neves, kada fulan iha tema espesífiku ida atu deskute durante fulan lima nia laran, to'o Dezembru. Iha Setembru sei halo mós debate ida iha 20 Setembru com insidente ho Loron Mundial de Paz.  

“Ne'ebé tema sei iha ligadu ho misaun justisa ho paz iha Timor-Leste. Iha Outubru sei halo mós debate ida iha 12 de Outubru com insidente ho vizita Santo Padre mai Timor-Leste. Foti mós mensajem prinsipál iha 12 de Outubru ne'ebé amu papa ko’alia iha Timor iha tempu ne'eba, kona-ba ‘Masin no naroman ba rai’ entaun tema importante ida mak ne'e,” nia esplika. 

Nia dehan, PR nu'udar xefi do estado hato'o ninia disponivel atu hato'o deskursu badak iha seremonia abertura iha dia 3 de Agusto. 

José Neves mós husu ba ema hotu-hotu, atu promove nafatin justisa ho paz iha rai ida ne'e. Tanba, tuir nia, justisa ho paz la'ós buat ida ket-ketak malu. Laiha paz em justisa. I justisa labele produs buat seluk alein de produs paz ba sosiedade tomak. Ida ne'e misaun permanente sosiedade tomak. 

“Justisa la'ós kesaun equilivre. Justisa kestaun diretu. Ne'ebé fó ba Sezar saida mak Sezar nian, fó ba Maromak, saida mak maromak ninian. La'ós equilivre. Maromak ho Sezar lahanesan,” nia dehan tan.