Lamentasaun ne’e, PM hato’o relasiona ho kazu oho malu ne'ebé deskonfia entre Timor-oan ne'ebé akontese iha Magetan, Sentru Jawa, Indonézia foin lalais ne’e ne'ebé halakon estudante Timor-oan João Bosco Batista Colo mate. 

"Ha'u lamenta tebes ba akontesimentu ida ne'e. Saida mak ha'u ko'alia mak apelu ba joven sira atu hadomi oituan ita nia vida," dehan PM Taur Matan Ruak iha Palásiu Prezidensial Bairru-Pite, Kinta (18/07/2019).

"Sente katak ita atu mai iha mundu inan-aman terus boot mak ita mai. Derepente de'it hasai vida. Husik ba Maromak mak hasai ita nia vida, la'ós ita ho ita," dehan PM Taur.

Ho atetude juventude hanesan ne'e, PM dehan Timor-Leste iha fama di'ak, maibé iha balun ne'ebé mak hafoer TL nia naran. "Joven sira iha TL nia komportamentu di'ak. Mas iha ida rua mak nia komportamentu kontinua hanesan ne'e," PM esplika. 

Xefe governu ne’e mós husu ba Joven Timor-oan atu hadomi ida-idak nia moris. Tanba ida ne'e importante tebes nu'udar Timor-oan.