PGR Hasoru Autoridade RI Ko'alia Kona Ba Kazu Droga Involve Kazal TimorOan Featured

Prokurador Jeral da Republika, Dr. Jose Ximenes hatoo hela deklarasaun ba Midia iha Palasiu PR  (22/07) Prokurador Jeral da Republika, Dr. Jose Ximenes hatoo hela deklarasaun ba Midia iha Palasiu PR (22/07) Foto Midia PR

Tempotimor (Dili) – Prokurador Jerál da Repúblika (PJR), José Ximenes rekoñese kazal Timor-oan, JSP no AS ne'ebé agora detein hela iha Atambua, Distritu Belu, Indonézia nu'udar autór prinsipál ba kazu droga.

Prokuradór Jerál José Ximenes hatete lia hirak ne'e, Segunda (22/07/2019) bainhira remata sorumutu mensal ho Prezidente Repúblika iha Palasiu Presidensial Bairru-Pite, Dili.

Nia hatete,Timor-Leste respeitu ho sistema judisiál Indonézia nian ne'ebé la'o hela ba kazu ida ne'e. “Agora faze ne'e sei inisia hela. Portantu, ami konkorda atu aprofundu lai investigasaun depois mak ita ko’alia fali ba oin,” hatete PJR.

Hatán kona-ba posibilidade prosesu estradisaun, Ximenes dehan, la preiza ko’alia to'o iha ne'ebá. Tanba entre Timor-Leste ho Indonézia seidauk iha kooperasaun kona-ba estradisaun no transfere kondenadu. “Ne'ebé, ita lalika ko’alia to'o iha ne'ebá lai,” nia afirma.

Maske nune’e Prokurador Jeral da Republika Timor Leste ne’e iha loron 03 Jullo tinan ne’e hala’o ona vizita ba Jakarta hodi hasoru malu ho autoridade Republika Indonezia (RI) liu liu ko’alia ho Vise Komandante Polisia Republika Indonezia ho Ministru Justisa Indonezia ninian. “Ko’alia oin tuan kona ba asuntus kooperasaun entre estadu timor Leste ho Indonezia ninian iha ambitu material penal. Espesifikamenete ko’alia mos kona ba ita nia sidadaun rua ne’ebe iha hela indonezia,” dehan Jose Ximenes.

Hanesan antes ne’e publika ona, kazal Timor-oan ho inisial JSP no AS hetan kaptura hosi autoridade Alfandega Atambua, Belu, Indonézia, Kuarta (29/05/2019) depois kazal ne'e lori tama droga ho tipu extase iha kaixa makina imprimi nia laran.

Identifikasaun ne'ebé Unidade Polísia Droga Indonézia nian deskobre, kazal Timor-oan lori droga hamutuk 1.861 grama pílula. Tuir lei kona-ba droga Indonézia nian, JSP no AS bele hetan ameasa pena de morte.

Rate this item
(0 votes)
Last modified on Monday, 22 July 2019 23:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com