"Ami mós halo vizita balun ba munisípiu, ne'ebé ami mós haree iha asuntu balun ne'ebé mak preokupa, hanesan falsifikasaun dokumentus, dadus pesoál veteranu sira-nian, entaun fulan Novembru ita akuza pelunus ema na'in hitu iha munisípiu Bobonaru ne'ebé komete kazu falsifikasaun ne'e," PJR hateten iha Palásiu Prezidensiál Bairru-pité, Segunda (14/12).

José da Costa Ximenes hatutan, iha de'it fulan Novembru MP akuza tan sidadaun na'in hitu ne'ebé falsifika dokumentus.

Nia mós dehan, agora daudaun iha nivél nasionál gabinete sentrál kombate korupsaun no krime organizadu halo hela investigasaun.

"Ha'u só aviza de'it ba sira ne'ebé kostuma halo falsifikasaun dokumentus, hein sira-nia tempu, ida ne'e sériu, durante ha'u ba munisípiu balun nunka tama iha prizaun nein loron ida, maibé sira tau iha dokumentu pesoál ne'e 8/14 iha prizaun, entaun ida ne'e hatudu inkapasidade komisaun omenajem nian," nia dehan.

Nia mós afirma, iha tan ona lista lubuk ida ne'ebé rejistu iha ne'ebá, tanba ne'e governu presiza tau atensaun ba kestaun ne'e.

"Ami agora tau atensaun didi'ak kona-ba lei kona-ba kombatentes libertasaun nian ne'ebé iha artigu balun ne'ebá dehan, ema ne'ebé falsifika dokumentu sei lakon ninia direitu, entaun ami tenta hela ho Ministériu relevante para haree kestaun ne'e ho sériu," PJR hateten.(*)