“Sim iha pedidu husi Ministériu Públiku husi Prokuradór Jerál Repúblika, loloos faze ne'e sei faze inkéritu la'ós julgamentu tribunál nian, seidauk to'o iha ne'eba maibé faze inkeritu ninian, liga ho kazu abuzu do poder”, hatete Aniceto iha PN, kinta (12/05).
Pedidu ne'ebé haruka husi MP, ne'e hakerek iha ne'eba sita abuzu poder no kazu ne'e dala ruma Komisaun Anti Korrupsaun (KAK) finaliza ona prosesu investigasaun, maibé antes Ministeriu Públiku haruka ba Tribunál halo akuzasaun, sira tenke halo fali inkeritu ida.
Tanba ne'e, Prokuradór Jerál Repúblika husu Parlamentu Nasionál atu foti imunidade deputadu Arão Noe Amaral ninian hodi bele tuir prosesu sira ne’e.
“Durante ne'e ami, ita-boot sira akompaña, parlamentu atu foti deputadu ida nia imunidade ne'e wainhira akuzasaun prontu ona, julgamentu atu la'o iha Tribunál mak, Juis sira mak husu mai PN atu foti imunidade deputadu ida nian”, esplika nia.
Maibé ne'e la hanesan babain, tanba ne'e meza sei konsulta ho asesór juridiku sira antes avansa ba plenária atu deside foti ka la foti imunidade iha faze inkeritu husi Ministériu Públiku.
“Sim, ne'e tanba liga ho abuzu poder ne'e laiha duvida ke akontese wainhira nia ejerse hela nia funsaun hanesan Prezidente Parlamentu Nasionál”, hatete nia. (*)