Situasaun ne’e akontese iha loron 02 fulan-fevereiru tinan 2023, parte dader, wainhira estudante inisiál C tinan-10 ba eskola, maibé koordenadór eskola la hatan atu tuir prosesu aprendijasen, tanba propiñas anu letivu tinan 2022 no inskrisaun anu letivu 2023 nian, parte família ba estudante la-da'uk selu.
Nune'e Koordenadór eskola haruka fila estudante hodi fó hatene ba nia inan ho aman atu selu propiñas anu letivu 2022 nian, inklui osan inskrisaun anu letivu 2023 nian, hafoin bele tuir prosesu aprendijasen hamutuk ho nia kolega na'in-13 iha sala laran.
Maibé aman ba estudante ho emosaun hasoru koordenadór iha fatin eskola Uamanuboe, tanba lasatisfas ho dezisaun ne'ebé koordenadór eskola foti hasoru nia oan.
Wainhira aman ba estudante inisiál C to'o fatin eskola, defende nia oan hodi ko'alia ho Koordenadór, maibé responsavél ba eskola tenta fó hanoin koba-bá regras eskola privadu nian ne'ebé kada fulan tenke selu, no tama fali tenke liuhusi inskrisaun selu US$1.00.
Tanba estudante inisial C nia maluk seluk hamutuk 94, kompostu husi primeira anu to'o sestu anu, ne'ebé dadaun tuir ona prosesu aprendijasen ba anu letivu 2023 nian, selu kompletu propiñas anu letivu 2022 no rejistu foun anu letivu 2023, maibé estudante inisiál C la prieñse regras, tanba inan aman la selu propiña tinan 2022 US$6.00 no inskrisaun foun 2023 US$1.00.
"Regras eskola nian fulan-ida sentavus US$0,50 tinan ida US$6.00, osan ba inskrisaun nian US$1.00 hamutuk US$7.00, nia aman mai hakilar haruka estudante sai hotu kedas, entaun ha'u haruka labarik sira tama fali sala, ha'u fila nia tuku kedas ha'u nia inus, ha'u bidu kedas iha odamata oin, rán suli tiha ona", dehan vítima Koordenadór eskola, Andre Braz Belo iha Tribunál Distritál Baukau (TDB), Kinta (09/02).
Hafoin tuku tiha vítima, aman ba estudante husik kedas fatin akontese hodi ba entrega aan iha Ofisiál Polísiamentu Suku (OPS) no Autoridade Suku Ualili.
Nune'e liu tiha oras ida, parte seguransa husi Komandu Polísia Nasionál Timor-Leste (PNTL) Munisípiu Baukau, ne'ebé liuhusi Eskuadra PNTL Postu Baukau Vila, to'o kedas fatin hodi evakua vítima no suspeitu ba edifisiu Eskuadra PNTL Baukau vila, hodi detein suspeitu kumpre 72 oras.
Kontinua evakua vítima ba Ospitál Referal Eduardo Ximenes (HoREX-sigla portugés) Baukau hodi halo tratamentu, maibé pesoal sira fó deskansa ba vítima iha sala baixa durante oras 7 hafoin haruka fila ba uma iha parte loraik, tanba vítima hetan kustura 6 husi kanek ne'ebé tuku husi suspeitu.
"Rán suli makas, to'o iha ne'eba doútor sira hamoos ho tísu, nia suku pontu 6 iha parte inus, ha'u deskansa tiha iha ne'eba, loraik ha'u alta", nia afirma.
Hafoin fila husi HoREX, iha loron 04 fulan-fevereiru tinan 2023 vítima hetan kontaktu husi Ministéru Públiku (MP) Baukau katak, atu tuir primeiru interogatóriu oras tuku 02:00 iha Tribunál Distritál Baukau (TDB) no konsege vítima kumpri.
Hafoin remata tuir primeiru interogatóriu iha TDB, no rona rezultadu primeiru interogatóriu nian iha loron 09 fulan-fevereiru tinan 2023 katak, kazu agresaun fizika simples.
Nune’e, TDB fó livre ba suspeitu no aplika multa hamutuk US$102.00, ne'ebé kompostu husi multa ba TDB US$10.00 no restu fob a vítima, atu rekoopera durante gastus ba aluga karreta ba tratamentu iha HoREX fila ba uma no husi uma ba TDB, maibé duranre loron 30 nia laran suspeitu la halo multa, sei hetan kastigu tuir lei haruka haruka.
Dezisaun ne'ebé TDB aplika ba suspeitu, halo vítima la satisfas, tanba la fó sansaun ruma ba suspeitu, posibilidade sei ameasa boot ba vida mestre sira iha área rurais, ne'ebé dook husi parte seguránsa sira.
"Dezisaun ne'e ha'u la simu, hakarak kazu ne'e la'o ba oin, tanba sé de'it mak baku ami iha eskola, ami iha sala mak sira baku ga, laiha sala mak sira baku, laiha sansaun ruma ba suspeitu, ha'u la satisfas", nia argumenta.
Tuir planu, iha loron 13 fulan-fevereiru, vítima sei hasoru hikas parte defeza hodi halo rekursu atu kontinua prosesu kazu ne'e ba oin.
Vítima mós sei hato'o kazu ne’e ba responsabilidade masimu eskola EBF Uaimanuboe, inklui Ministériu Edukasaun Juventude no Desportu (MEJD) hodi tetu, tanba vítima durante nunka halo problema ruma ho suspeitu, maibé tán de'it osan propiñas no inskrisaun 2023 tuir regras eskola nian, ne'ebé hamutuk US$7.00, to'o hetan kustura 6 iha parte inus, iha oras servisu nian. (*)
