Diretór Sekretáriadu Tékniku Administrasaun Eleitórál (STAE) Munisípiu Baukau, Lucio Freitas Salvador, hatete, iha loron 19 fulan-abril tinan-2022 (ohin) hahú husi tuku 06:00 parte dader to'o agora, situasaun ba prosesu eleisaun prezidénsial iha Munísipiu Baukau la'o diak.
Maibé, iha loron 18 fulan-abril tinan-2022 (horiseik) pur-volta tuku 06:00 parte loraik bainhira matérial siensetivu to'o iha sentru votasaun Uai-aka, Suku Tekinaumata, Postu Adminisitrativu Laga, iha sidadaun ida kondisaun lanu, tenta halo perturbasaun, maibé ofisiál sira inklui parte segúransa Polísia Nasionál Timor-Leste (PNTL) Munísipiu Baukau asegura kedas.
"Nia koko atu halo perturbasaun, maibé hodi kalan kedas task force asegura tiha, dadaun iha hela kantór Polísia," dehan Lucio iha kna'ar fatin, tersa (19/04).
Hafoin halo kapturasaun ba sidadaun refere iha sentru votasaun, ékipa task force evakua kedas ba sela detensaun no kontinua ba prosesu investigasaun.
Alende ne’e, iha loron 19 fulan-abril tinan-2022 (ohin) parte dader, mosu krime eleitóral iha sentru votasaun kaibada Makasae, Postu Baukau Vila, tanba sidadaun ida tenta hasai fotografia iha kabiña de votus laran.
"Ida hasai votus nia fotografia ne'e mós sira (PNTL Baukau) kaptura tiha ona iha hela investigasaun," nia informa
Tuir nia, kazu krime eleitóral previstu iha kodigu penál hahú husi 229 to'o iha 342 ne'e ko'alia kona-ba krime eleitóral ne'e.
To'o notisia ne'e públika, www.tempotimor.com seidauk hetan konfirmasaun husi Komadante Komandu PNTL Munísipiu Baukau, Superintendente António De Sá, tanba laiha fatin. (*)