“Primeiru sira ba tiha iha dader, e iha loraik purvolta 4 e diante ba halo tán, barullu hanesan e provoka hodi halo aktu tuda malu, e rezulta militante CNRT ida ulun fatuk kanek. Ami hakarak nota katak, iha alegasaun katak ema balun uza medida ne'ebé presiza investiga klean, tanba alegasaun sira ne'e mai husi kraik”, dehan Portavóz Ekipa Susesu Kandidatu José Ramos Horta, Deonisio Babo, liuhusi konferénsia imprensa iha Sede Nasionál Kandidatura, Hudi Laran, kinta (17/03)

Nu’udar ekipa susesu husi kandidatu CNRT nian, lamenta teb-tebes ho atetude husi joven sira ne'e iha ambitu komisiu politika husi kandidatura balun, tanba uza atributu partidu nian, ba halo provokasaun iha Sede partidu CNRT to'o iha laran.

“Assaun ida ne'e hetan mós reasaun husi labarik sira ne'ebé hamriik iha ne'ebá e maibé ida ne'e hatudu de'it falta de organizasaun, falta dignifikasaun ba prosesu komísiu eleitorál no prosesu ne'ebe mak la'o iha tempu kampaña e la edukativu”, hatete nia.

Ba aktu sira ne'e, ekipa susesu haree katak ne'e iha tendénsia atu sai violentu, tanba halo perturbasaun iha sede partidu CNRT.

Iha ne’e, husu mós ba Polísia Nasionál Timor-Leste liliu orgaun kompetente sira atu identifika veikulu ne'ebé xapa matrikula la klaru.

Tanba durante komisiu kampaña, parte ekipa susesu Horta rejista katak iha komisiu balun mosu karreta sira ne'ebé nia matrikula la klaru, matrikula balun hasai tiha, no lahatene karreta sira ne'e mai husi ne'ebé.

“Ida ne'e konstitui tebes violasaun ne'ebé mak tuir lolos tenke iha atensaun husi polisia tránzitu sira ou orgaun ne'ebé kompetente hodi bele eskrutiniza nomós haree identifika veikulu sira ne'ebé mak viavel duni atubele uza iha kampaña”, dehan nia. (*)