“Los duni katak iha insidente ida akontese iha sentru votasaun eskola bázika Fomentu 2 hodi bainrua, maizomenus tuku 16:00 hanesan ne’e, fiskál sira halo hela kontajen votu, iha grupu balun halo ataka ba sentru votasaun, tanba la simu rezultadu kontajen votu. Sira hahú halo impedimentu hodi halo asaltu ba fiskál nomós ofisiál sira”, dehan Komandante PNTL, Munsípiu Dili, Superintendente Xefe Henrique da Costa, liuhusi telefone, segunda (21/03).

Iha akontesimentu ne’e rezulta ema na’in-rua kanek, tanba tenta hakalma situasaun no ekipa baku fera tiha vidru eskola nian.

“Ita-nia polísia sira ne’ebé halo seguransa iha fatin refere, la konsege  halo atuasaun, tanba grupu ne’e ema barak, nune’e membru sira kontaktu mai iha Komandu Munisípiu, ami haruka kedan Forsa Reserva (Taskforce) ne’ebé hetan apoiu husi Unidade Espesiál Polísia (UEP) no Komandu Eskuadra Dom Aleixo ba konsege hakalma situasaun no detein kedan suspeitu hamutuk ema na’in-21, ita lori sira mai kedan iha Komandu PNTL hodi hatama sira iha sela detensaun Komandu PNTL Dili durante oras 72,  halo prosesu  ba Ministériu Públiku antes lori sira submete ba primeiru interogatoriu iha Tribunál”, esplika nia.

Aleinde ne'e mós, PNTL Dili apoiu másimu husi UEP halo aprensaun ba karreta haat ho motorizada lima ne’ebé deskonfia utiliza husi suspeitu na’in-21 hodi halo atus krime.

Husi evidénsia sira ne’e, dadaun rai ona iha Komandu PNTL Dili hodi kontinua investiga hafoin supmete ba Ministériu públiku.

Komandu PNTL Dili mos lori vítima na’in-rua ne’ebé suspeitu sira halo agresaun fiziku to’o hetan kanek ne'e, ba halo tratamentu iha Ospitál Nasionál Guidu Valadares(HNGV), hafoin ne’e sira na’in ba presta deklasaun iha Komandu PNTL Dili.

Entretantu Komandante PNTL, Munsípiu Dili, Superintendente Xefe Henrique, rekonese suspeitu na’in-21, ne’ebé halo atake ba sentru votasaun Fomentu 2 sira mai husi apoiante Kandidatu Prezidente Republika balun.

“Los duni sira ne’e ami identifika katak sira ne’e apoiu ba kandidatu ida tanba sira ne’e la satisfas ho rezultadu ne’e mak sira halo asaun ida ne’e”, hatete nia.

Maibé, Komandante PNTL Munisípiu Dili ne’e, rejeita suspeitu sira ne’e apoiante husi Kandidatu Prezidente Repúblika ne’ebé, tanba kazu sei iha hela prosesu investigasaun nia laran. (*)