"Populasaun Atsabe maiória halo toos no fila liman. Entaun, ami identifika katak kuaze 40% mak vulneravél, tanba hela iha suku no aldeia ne'ebé izoladu liu, maibé pursentu 60% moris di'ak hotu," dehan nia, ba www.tempotimor.com, Segunda (21/9).
Nia afirma, alende husi kondisaun populasaun Atsabe nian, iha mós difikuldade boot ida ne'ebé sai mós problema ba povu Atsabe mak estrada.
"Estrada husi nasionál ba munisípiu di'ak, maibé husi munisípiu ba Atsabe araska loos. Depois iha suku sira ne'e kuandu bai-loron ne'e movimentu transporte di'ak, maibé tempu udan movimentu transporte arraska oituan," nia dehan.
Alende husi kondisaun povu no estrada ninian, Atsabe mós la'ós hela liu iha kotuk kona-ba saúde no edukasaun nian, maibé iha setór rua ne'e di'ak oituan.
"Kona-ba sentru saúde di'ak, tanba suku hitu mak iha hotu ona, maibé suku lima mak seidauk. Depois kona-ba edukasaun nian di'ak, tanba eskola husi pre-eakolár to'o sekundária iha hotu suku sira iha postu Atsabe," katak nia.
Entretantu, postu administrativu Atsabe hola parte iha Munisípiu Ermera ne'ebé kompostu husi suku 12, aldeia 59 ho nia totál populasaun 25.197 kompostu husi xefe familia 5.296 no estrada ne'ebé liga husi kapitál munisípiu Ermera ba Atsabe kilometru hamutuk kilometru 60 no kilometru 15 mak di'ak, maibé kilometru 45 ladún di'ak.(*)