Diretor Serbisu Saude Munisipiu Ermera Antonio de Deus Fatima informa, iha Kinta dader, familia ida husi Hatulia lori sira-nia membru familia mai aprezenta iha sentru saúde ho razaun nia membru familia ne'e dezenvolve hela sintomas Covid-19.
"Ohin dader mak nia (suspeitu) foin hetan sintomas ida ne'e no ninia inan ki'ik lori kedas nia hodi aprezenta ba sentru Saude Hatulia," informa Antonio via telefone, Kinta (16/04).
Hafoin suspeitu aprezenta an, nia hatete, nia parte kontaktu kedan Ministériu Saúde hodi haruka ekipa vijilansia no epidemolojia hodi tuun ba Ermera atu halo teste ba suspeitu refere.
Diretór ne'e dehan, tuir informasaun, suspeitu ho insial DA tama iha kuarentena no foin sai iha 11 Abril liu ba.
Molok ne'e, Antonio dehan, gabinete Sentru Integradu Jestaun Krize (SIJK) kontaktu ona parte Saude Munisipiu Ermera atu kontrola sira ne'ebé livre ona husi kuarentina, maibé DA sai husi kuarentina fila mai ho motor, nune'e susar atu kontrola.
"Ita iha ona koordenasaun, Sentru Integradu Jestaun Krize sempre kontaktu mai ami kuandu maluk sira Ermera-oan ne'ebé mak livre ona husi kuarentena loron 14, maibé sidadaun ida ne'e mai la liu husi autoridade munisipal no mós serbisu Saude Munisipiu Ermera, tanba sira-nia familia ho inisiativa rasik ba tula nia ho motor husi Dili ba liu Hatulia," dehan nia.
Daudaun ne'e, nia hatete, suspeitu hela iha pesoal saúde balun nia uma no ninia parte halo ona aprosimasaun hodi bele hetan informasaun kona-ba kontatu hirak ne'ebé suspeitu halo ona.
"Ami labele fó sai uluk nia pozitivu ka negativu, tanba agora dadaun ekipa epidemiolojia husi Ministériu Saude ho ekipa laboratoriu nasional ba ona iha suspeitu ninia hela fatin par investiga kle'an ka halo teste ruma ba nia, maibé atu hatene nia pozitivu ka negativu aban tuku 3 lokraik mak bele fó sai," dehan nia.